काठमाडौं, असोज १५ । हिमपहिरो, बाढी तथा पहिरोबाट कृषि क्षेत्र र किसानमाथि परेको क्षतिलाई केवल प्राकृतिक विपद्का रूपमा नहेर्न तीन वामपन्थी किसान संगठनले सरकारसँग माग गरेका छन्।
अखिल नेपाल किसान महासंघ (अप्फा), क्रान्तिकारी किसान महासंघ नेपाल र अखिल नेपाल प्रगतिशील किसान संघले संयुक्त वक्तव्य जारी गर्दै विपद्का कारण खेतीयोग्य जमिन कटान तथा पुरिनुका साथै धान, मकै, गहुँ, तरकारी, फलफूल र नगदेबालीमा ठूलो क्षति पुगेको बताएका छन्। पशुचौपाया, बीउ, कृषि औजार, गोठ तथा सिँचाइ, खानेपानी र ग्रामीण कृषि सडकमा समेत व्यापक क्षति पुगेको उनीहरूको भनाइ छ।
संगठनहरूले जलवायु परिवर्तन, अव्यवस्थित पूर्वाधार निर्माण, नदी–खोला अतिक्रमण, कमजोर भू–उपयोग नीति तथा असुरक्षित बस्तीका कारण प्राकृतिक विपद्को क्षति थप गम्भीर बनेको बताएका छन्।
विपद्पीडित किसानका लागि तत्काल राहतसँगै भूमि पुनर्स्थापना, ऋण राहत, कृषि बीमा, उत्पादन पुनःस्थापना, सुरक्षित बस्ती निर्माण, जलाधार संरक्षण र प्रकृतिमैत्री विकासलाई समेटेर एकीकृत राष्ट्रिय कार्यक्रम सञ्चालन गर्न उनीहरूले माग गरेका छन्।
“किसानको खेत बग्नु भनेको उसको उत्पादनको साधन, आयको आधार र भविष्यको जीवन–सुरक्षा नै संकटमा पर्नु हो,” संयुक्त वक्तव्यमा भनिएको छ। किसानको उत्पादन क्षमता र जीविकोपार्जन पुनःस्थापनाको सम्पूर्ण जिम्मेवारी राज्यले लिनुपर्नेमा तीन संगठनले जोड दिएका छन्।
संयुक्त वक्तव्यमा अखिल नेपाल किसान महासंघ (अप्फा)का अध्यक्ष भैरबराज रेग्मी, क्रान्तिकारी किसान महासंघ नेपालका अध्यक्ष सीताराम तामाङ र अखिल नेपाल प्रगतिशील किसान संघका अध्यक्ष रामदुलार महतोले हस्ताक्षर गरेका छन्।
