काठमाडौँ । बाढीपहिरो तथा सडक मर्मतका कारण बागमती र कर्णाली प्रदेशका सात जिल्लामा मुख्य राजमार्ग तथा सडकखण्ड प्रभावित भएका छन् ।
नेपाल प्रहरीले २०८३ भदौ २६ गते बिहान ६:२० जारी सूचनामा सो जानकारी दिइएको हो ।
बागमती प्रदेशमा रसुवाको उत्तरगया गाउँपालिका–५ खाल्टेमा त्रिशूली–मेलुङ–स्याफ्रुबेसी सडकखण्ड पूर्ण रूपमा अवरुद्ध छ भने मुख्य राजमार्गका केही खण्डमा पनि पूर्ण अवरोध रहेको छ ।
त्यस्तै नुवाकोटमा शिवपुरी गाउँपालिकास्थित छहरेखोलामा टोखा–छहरे सडकखण्डमा रातिको समयमा सवारी सञ्चालनमा रोक लगाइएको छ । राति १० बजेदेखि बिहान ५ बजेसम्म अर्को सूचना नभएसम्म सवारी साधन सञ्चालनमा रोक लगाइएको हो । बेत्रावती नगरपालिका–१० सिमटारमा पासाङल्हामु सडकखण्ड पूर्ण रूपमा अवरुद्ध छ ।
धादिङमा बेनीघाट रोराङ गाउँपालिका–७ कृष्णभिरमा पृथ्वी राजमार्ग पूर्ण रूपमा अवरुद्ध भएको छ । सोही गाउँपालिकाको वडा नम्बर १० ज्वाङखोलामा भने सडक एकतर्फी सञ्चालन भइरहेको छ । थाक्रे गाउँपालिका–२ बाहकिलोमा पनि पृथ्वी राजमार्ग एकतर्फी सञ्चालनमा रहेको छ भने सोही क्षेत्रको अर्को खण्डमा पूर्ण अवरोध रहेको प्रहरीले जनाएको छ ।
यता, चितवनको बेनीघाट रोराङ–१० ज्वाङखोला क्षेत्रमा पनि पृथ्वी राजमार्ग एकतर्फी सञ्चालनमा रहेको छ । सिन्धुपाल्चोकको भोटेकोशी गाउँपालिका–२ घट्टेखोलामा अरनिको राजमार्ग पूर्ण रूपमा अवरुद्ध छ ।
त्यसैगरी काभ्रेमा सम्भावित बाढीपहिरोको जोखिमलाई मध्यनजर गर्दै बी.पी. राजमार्गमा सवारी सञ्चालनमा समयानुसार व्यवस्था गरिएको छ । खुर्कोट–नेपालथोक–काठमाडौँतर्फ चल्ने सवारी साधनलाई परिस्थिति हेरेर सञ्चालन गरिने जनाइएको छ ।
कर्णाली प्रदेशको मुगुमा छायानाथ रारा नगरपालिका–४ ताल्चामा मुगु–मुगुम कार्मारोङ सडक पूर्ण रूपमा अवरुद्ध भएको छ ।
