काठमाडौं, साउन २९ । साहित्यिक पत्रकार संघ (सापस)को ५५औँ वार्षिकोत्सवका अवसरमा पाँचजना सर्जकलाई ‘सापस विशिष्ट सर्जक सम्मान’द्वारा अभिनन्दन गरिएको छ।
अभिनन्दित हुनेमा संस्कृतिविद् डा. पुरुषोत्तमलोचन श्रेष्ठ, चित्रकार प्रा. मदन चित्रकार, कवि ज्ञान उदास तथा कलाकारद्वय चैत्यदेवी सिंह र सन्तोष पन्त रहेका छन्। कार्यक्रममा कवि दीपा राई पुन (अमेरिका)लाई ‘व्यथित काव्य डायस्पोरा सम्मान–२०८२’ प्रदान गरिएको थियो।
संघका अध्यक्ष राधेश्याम लेकालीको सभापतित्वमा सम्पन्न कार्यक्रममा नेपाल ललितकला प्रज्ञा–प्रतिष्ठानका पूर्वकुलपति के.के. कर्माचार्य प्रमुख आमन्त्रित व्यक्तित्वका रूपमा उपस्थित थिए। कर्माचार्य र लेकालीले सम्मानित सर्जकलाई दोसल्ला, ढाकाटोपी तथा फूलमाला लगाई अभिनन्दनपत्र प्रदान गरेका थिए।
कार्यक्रममा समालोचक प्रमोद प्रधानले अभिनन्दित सर्जकहरूको योगदान र परिचय प्रस्तुत गरेका थिए। उनले कवि ज्ञान उदासका आठ कृति प्रकाशित भएको, प्रा. मदन चित्रकारका कला सम्बन्धी पुस्तक प्रकाशित भएको तथा चैत्यदेवी सिंहले अभिनय, नृत्य र गीति नाटकका क्षेत्रमा योगदान पुर्याएको बताए।
त्यस्तै, संस्कृतिविद् डा. पुरुषोत्तमलोचन श्रेष्ठ इतिहास, पुरातत्त्व तथा नेवारी संस्कृति अध्ययन–अनुसन्धानमा सक्रिय रहेको र कलाकार सन्तोष पन्तले रेडियो नाटक, रंगमञ्च तथा टेलिसिरियलमार्फत छुट्टै पहिचान बनाएको प्रधानले उल्लेख गरे।
अध्यक्ष लेकालीले वि.सं. २०२९ मा स्थापित संघले विभिन्न आरोह–अवरोह पार गर्दै साहित्यिक तथा रचनात्मक गतिविधिलाई निरन्तरता दिँदै आएको बताए। संघले २०३८ सालदेखि कथा दिवस मनाउँदै आएको, विभिन्न कार्यक्रम सञ्चालन गर्दै आएको तथा स्रष्टाका कृतिलाई अडियोमा ल्याउने कार्यसमेत सुरु गरेको जानकारी दिए।
सम्मानित सर्जकहरूले आफूहरूको योगदानको मूल्याङ्कन गरी सम्मान गरेकोमा संघप्रति आभार व्यक्त गरे। कार्यक्रममा कवि ज्ञान उदासले दुई मुक्तक वाचन गरेका थिए भने विभिन्न व्यक्तित्वले शुभकामना मन्तव्य दिएका थिए।
अनामनगरस्थित डालो रेस्टुरेन्टमा आयोजित कार्यक्रममा संघकी कोषाध्यक्ष पद्मावती सिंहले धन्यवाद ज्ञापन गरेकी थिइन् भने साहित्यकार सविता श्रेष्ठ ‘बेहोसी’ले सहजीकरण गरेकी थिइन्।
