ओसाका (जापान), ४ अगस्ट । जापान नेपाली एकता समाज क्षेत्रीय समिति खान्साई र रकिम सांस्कृतिक अभियान जापानले संयुक्त रूपमा आयोजना गरेको जनवादी गायक जीवन शर्माको सांगीतिक कार्यक्रम भव्यरूपमा सम्पन्न भएको छ ।
मंगलबार जापान नेपाली एकता समाज र रक्तिम सांस्कृतिक अभियान जापानले संयुक्त रूपमा जारी गरिएको धन्यवाद वक्तव्यमा ३ अगस्ट २०२६ मा ओसाकास्थित ताको प्लाजामा आयोजित कार्यक्रमलाई भव्य बनाउन प्रत्यक्ष तथा अप्रत्यक्ष रूपमा योगदान पुर्याउने सबैप्रति कृतज्ञता प्रकट गरिएको छ । आयोजकका अनुसार कार्यक्रममा विशिष्ट अतिथि, आमन्त्रित अतिथि, विभिन्न संघ–संस्थाका प्रतिनिधि, कलाकार, पत्रकार, दर्शक तथा स्वयंसेवकहरूको उल्लेखनीय उपस्थितिले कार्यक्रमलाई थप गरिमामय बनाएको थियो ।
वक्तव्यमा जनवादी गायक जीवन शर्माले नेपाली जनवादी गीत–संगीतमार्फत सामाजिक चेतना, प्रगतिशील विचार र सांस्कृतिक जागरणको सशक्त सन्देश प्रवाह गरेको उल्लेख गर्दै उहाँको ओजस्वी प्रस्तुति, सिर्जना र प्रेरणादायी अभिव्यक्तिले कार्यक्रमलाई अत्यन्त भावपूर्ण, अर्थपूर्ण र अविस्मरणीय बनाएको जनाइएको छ।
त्यसैगरी, नेपाली मौलिक संस्कृतिको प्रवद्र्धनमा योगदान पुर्याउने गलकोट नौमती बाजा समूह र ओसाकाको नौमती बाजा समूह का सम्पूर्ण कलाकारहरूको प्रस्तुति कार्यक्रमको प्रमुख आकर्षण बनेको भन्दै उनीहरूको समर्पण, अनुशासन र सांस्कृतिक योगदानको उच्च प्रशंसा गरिएको छ ।
जापान नेपाली एकता समाज क्षेत्रीय समिति खान्साईका अध्यक्ष भुवन सापकोटा तथा रकिम सांस्कृतिक अभियान जापानका अध्यक्ष टिका केसीले संयुक्त रूपमा हस्ताक्षर गरेको उक्त वक्तव्यमा अन्त्यमा पुनः एकपटक सम्पूर्ण सहभागी तथा सहयोगीहरूप्रति हार्दिक धन्यवाद व्यक्त गरिएको छ ।
