बेलबारी, मोरङ। पूर्वका चर्चित कवि बादल चाम्लिङको अनुवाद कवितासङ्ग्रह ‘नाइटमेयर’ एक कार्यक्रमबीच सार्वजनिक गरिएको छ।
कृतिको सार्वजनिककरण वरिष्ठ साहित्यकार तथा राजनीतिक व्यक्तित्व हर्कमान तामाङ, बेलबारी साहित्य विकास समितिका अध्यक्ष रमेश निरौला, समीक्षक डा. मोहन तुम्बाहाङ तथा अनुवादक कवि बादल चाम्लिङले संयुक्त रूपमा गर्नुभएको थियो।
कार्यक्रमका प्रमुख अतिथि हर्कमान तामाङले अन्तर्राष्ट्रिय स्तरका विशिष्ट साहित्यकारका कृतिको अध्ययन र मनन अझ व्यापक बनाउन आवश्यक रहेको बताउँदै नेपाली साहित्यलाई पनि अन्तर्राष्ट्रिय स्तरमा पुर्याउनुपर्नेमा जोड दिनुभयो। उहाँले ‘नाइटमेयर’ जस्ता अनुवाद कृतिले नेपाली साहित्यलाई विश्वसामु चिनाउन महत्वपूर्ण योगदान पुर्याउने विश्वास व्यक्त गर्नुभयो।
कृतिका समीक्षक डा. मोहन तुम्बाहाङले अनुवाद कार्य सहज नभए पनि अनुवादक चाम्लिङले साहस, लगन र मेहनतका साथ कृति प्रकाशन गर्नु उल्लेखनीय उपलब्धि भएको बताउनुभयो। उहाँले कृतिभित्र समावेश कविताहरूको संक्षिप्त समीक्षात्मक टिप्पणी गर्दै यसले अन्य लेखक तथा पाठकलाई समेत सिर्जना र अनुवादतर्फ प्रेरित गर्ने विश्वास व्यक्त गर्नुभयो।
अनुवादक कवि बादल चाम्लिङले चुनौतीलाई अवसरका रूपमा स्वीकार गर्दै नेपाली कवितालाई अङ्ग्रेजी भाषी पाठकमाझ पुर्याउने उद्देश्यले अङ्ग्रेजीमा अनुवाद गरेको बताउनुभयो।
कृतिकारको परिचय गराउँदै चर्चाकार ईरान राईले भाषा शिक्षकले साहित्यको सैद्धान्तिक व्याख्यामात्र नभई सिर्जनात्मक अभ्यासमार्फत सिकाउनुपर्ने आवश्यकता औँल्याउनुभयो। उहाँले ‘नाइटमेयर’ले सिर्जना र अनुवाद दुवै कार्यको महत्वलाई उजागर गरेको धारणा व्यक्त गर्नुभयो।
कार्यक्रमका अध्यक्ष तथा बेलबारी साहित्य विकास समितिका अध्यक्ष रमेश निरौलाले स्थानीय स्तरमा सिर्जित नेपाली साहित्यको अङ्ग्रेजी अनुवाद न्यून रहेको उल्लेख गर्दै ‘नाइटमेयर’ले यस क्षेत्रमा नयाँ सम्भावना र फराकिलो बाटो खोल्ने विश्वास व्यक्त गर्नुभयो।
कार्यक्रममा साहित्यकार तथा समाजसेवी चन्द्रमणि राई, डा. छवि वैरागी घिमिरे, परशुराम सुवेदी, छत्र लिम्बू, शङ्कर गुरुङ, भगवतीप्रसाद घिमिरे, तिला लेकाली, देवान किराँती, प्रकाश दिप्साली राई, केपी घिमिरे, गगन याक्पाङ्देन, कृष्ण गुरुङ, धनजित पराजुली, हिरा खड्का अधिकारी, सञ्जीव धिमाल, अर्जुन कुलुङ राई तथा अजित धिमाललगायतको उपस्थिति रहेको थियो।
कृतिमा २७ जना विभिन्न कविका एक–एक कविता तथा अनुवादक स्वयंका १६ कविता गरी कुल ४३ वटा कविता समावेश गरिएका छन् ।
कार्यक्रम बेलबारी साहित्य विकास समितिका अध्यक्ष रमेश निरौलाको अध्यक्षता तथा कवि जे.बी. थुलुङको सञ्चालनमा बेलबारी–३ स्थित यालाङ होटलको सभाहलमा सम्पन्न भएको थियो।
