जनक बिसी
कोचिन (दक्षिण भारत), ३ अगस्ट ।
मूलप्रवाह अखिल भारत नेपाली एकता समाज कोचिन नगर समितिको आयोजनामा तारानाथ शर्मा र सरस्वती शर्माको सम्मान तथा बिदाइ कार्यक्रम सम्पन्न भएको छ।
नगर समितिका अध्यक्ष गणेश शर्मा पौडेलको अध्यक्षतामा आयोजित कार्यक्रमको सञ्चालन दक्षिण भारत क्षेत्रीय सदस्य तथा नगर अध्यक्ष बाबुराम केसीले गरेका थिए।
कार्यक्रमका प्रमुख अतिथि मूलप्रवाह अखिल भारत नेपाली एकता समाजका दक्षिण भारत क्षेत्रीय सदस्य जनक बिसीले संगठनको नीति, उद्देश्य र आगामी कार्यदिशाबारे मन्तव्य व्यक्त गरेका थिए। उनले संगठनलाई सुदृढ बनाउन सदस्यहरूबीच एकता, अनुशासन र सक्रिय सहभागिता आवश्यक रहेको बताए। संगठनले अघि सारेका उद्देश्य प्राप्तिका लागि सबै कार्यकर्ता प्रतिबद्ध भएर अघि बढ्नुपर्ने उनको भनाइ थियो।
कार्यक्रममा तारानाथ शर्मा र सरस्वती शर्मालाई सम्मानस्वरूप जोडीको तस्बिरसहितको स्मृति–चिन्ह प्रमुख अतिथि जनक बिसी र नगर अध्यक्ष बाबुराम केसीले संयुक्त रूपमा प्रदान गरेका थिए।
सो अवसरमा नगर उपाध्यक्ष जानकी बिसी, आशाराम घिमिरे, गणेश शर्मा (आर), कुलबहादुर गुरुङ, मेघराज उपाध्याय तथा गीता हमालले शुभकामना मन्तव्य व्यक्त गर्दै सम्मानित व्यक्तित्वहरूको योगदानको प्रशंसा गरेका थिए।
सहभागीहरूको उल्लेखनीय उपस्थितिमा कार्यक्रम सौहार्दपूर्ण वातावरणमा सम्पन्न भएको आयोजकले जनाएको छ।
