काठमाडौं, साउन १२ । भ्याली पब्लिक हाइ स्कुलको आयोजनामा पाँचौं भ्याली पब्लिक अन्तरविद्यालय फुटसल प्रतियोगिता बुधबारदेखि सुरु हुने भएको छ।
प्रतियोगितामा यु–१६ सिनियर ब्वाइज, यु–१६ सिनियर गर्ल्स र यु–१२ जुनियर ब्वाइज गरी ५८ टोलीको सहभागिता रहने आयोजकले जनाएको छ। विजेताले १५ हजार र उपविजेताले १० हजार रुपैयाँ नगद पुरस्कार प्राप्त गर्नेछन्। उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई पनि पुरस्कृत गरिनेछ।
करिब ३ लाख २५ हजार रुपैयाँ लागतमा सञ्चालन हुने प्रतियोगिता साउन १९ गतेसम्म भंगालस्थित भ्याली पब्लिक हाइ स्कुलको हलमा हुनेछ।
एसआरसी प्लस टु अन्तरकलेज छात्र बास्केटबल प्रतियोगितामा सीसीआरसीले ओमेगालाई ८०–४७ ले पराजित गरेको छ।
सीसीआरसीका सवाज खानले २२ अंक जोड्दै टोलीको जितमा महत्वपूर्ण योगदान दिए। प्रतियोगिताका अन्य खेलमा पुष्पसदनले गोल्डेनगेट ‘ए’ लाई ३४–३० तथा मनास्लुले गोल्डेनगेट ‘बी’ लाई ८६–३० ले पराजित गरे। सवाज खान, सिमोन रमजाली र शुभ खड्का आ–आफ्नो खेलका ‘म्यान अफ द म्याच’ घोषित भए।
करातेका सुमन तिमिल्सिना सम्मानित
एन्जल्स हार्ट नेसनल स्कुलले युएस ओपन आईएसकेए विश्व मार्सल आर्ट्स च्याम्पियनसिपका कांस्य पदक विजेता करातेका सुमन तिमिल्सिनालाई नगद ३० हजार रुपैयाँसहित सम्मान गरेको छ।
अमेरिकाको फ्लोरिडामा सम्पन्न प्रतियोगिताको पुरुष एकल कातामा कांस्य पदक जितेका सुमनलाई विद्यालयका प्रिन्सिपल टक थापा लगायतका पदाधिकारीहरूले सम्मान गरेका हुन्।
