काठमाडौँ, साउन २ । प्रगतिवादी साहित्यकार मोहनविक्रम सिंहद्वारा लिखित ‘१२ मे’ नाटक आगामी भदौ २१ गते काठमाडौँमा मञ्चन हुने भएको छ।
नेपाल प्रज्ञा–प्रतिष्ठानको मुख्य सभाहलमा नाटक मञ्चन गरिने आयोजकले जनाएको छ । नाटक प्रदर्शनका लागि हल बुकिङलगायतका प्रारम्भिक तयारी पूरा भइसकेको व्यवस्थापन समितिले जनाएको छ ।
नाटक प्रदर्शन व्यवस्थापन समितिका संयोजक आनन्दराज शर्माले कार्यक्रमको औचित्य र तयारीबारे जानकारी गराउनुभयो ।
उहाँले नाटक प्रदर्शनले पार्टीमा रहेका तथा पार्टीबाट अलग भएका पुराना–नयाँ व्यक्तिहरूलाई समेत एउटै साझा गतिविधिमा जोड्ने वातावरण निर्माण गरेको बताउनुभयो ।
वर्षायाममा ठूला आन्दोलन तथा संघर्षका कार्यक्रम सञ्चालन गर्न कठिन हुने भएकाले नाटक प्रदर्शनलाई सिर्जनात्मक गतिविधिका रूपमा अघि बढाइएको शर्माले बताउनुभयो ।
‘नाटक मञ्चनका लागि लामो समयदेखि रंगमञ्चमा सक्रिय अनुभवी तथा व्यावसायिक कलाकारहरू तयारीमा जुटेका छन् ।’ शर्माले अगाडि भन्नुभयो– ‘प्रज्ञा–प्रतिष्ठानको मुख्य सभाहल बुकिङका लागि १ लाख ६५ हजार रुपैयाँ बुझाइसकिएको व्यवस्थापन समितिले जनाएको छ।’
नाटक प्रदर्शनलाई सहभागिता र आर्थिक दुवै दृष्टिले सफल बनाउन आवश्यक योजना निर्माण तथा व्यवस्थापनका विषयमा भेलामा छलफल भएको थियो ।
व्यवस्थापन समितिको सदस्यमा दुर्गा पौडेल, मनोज भट्ट, रामप्रकाश पुरी, भैरवराज रेग्मी, मीना पुन, निमबहादुर बुढा, हरिकान्त शर्मा, समीर सिंह, सुभाष जिसी र गिरीप्रसाद बुढा रहनुभएको छ ।
मूल प्रवाह अखिल भारत नेपाली समाज (तत्कालीन अखिल भारत नेपाली एकता समाज) ले राष्ट्रिय पञ्चायत चुनाव बहिष्कारको पक्षमा मे १२, १९८६ मा नयाँदिल्लीमा सम्पन्न गरेको प्रदर्शन नै ‘१२ मे’ नाटकको विषयवस्तु रहेको छ ।
उक्त प्रदर्शनमा भारतीय प्रहरीले १० महिलासहित ९५ जनालाई गिरफ्तार गरी जेलचलान गरेको थियो । नयाँदिल्लीको तिसहजारी र पटियाला अदालतको आदेशअनुसार प्रदर्शनकारीलाई तीन महिनासम्म जेलमा राखिएको थियो ।
