खिमराज चालिसे, भारत

नियतिको खेल कति निष्ठुर हुन सक्छ भन्ने एउटा हृदयविदारक घटना भारतको हरियाणामा घटेको छ। विगत सात वर्षदेखि परिवारसँग सम्पर्कविहीन रहेका एक नेपाली नागरिक घर फर्किने सपना बोकेर यात्रा थालेका थिए। तर, गन्तव्यमा पुग्नुअघि नै सडक दुर्घटनामा परेर उनको मृत्यु भयो। वर्षौँदेखि प्रतीक्षामा रहेको परिवारले उनलाई भेट्न त पायो, तर जीवित रूपमा होइन, अन्तिम संस्कारका लागि शवका रूपमा।

अछाम जिल्लाको तुर्माखाँद गाउँपालिका–७ निवासी ४५ वर्षीय भवानीप्रसाद देवकोटा विगत सात वर्षदेखि परिवार र जन्मथलोबाट सम्पर्कविहीन थिए। लामो समयसम्म उनको अवस्था अज्ञात रहेपछि परिवार चिन्तामा थियो। अन्ततः सामाजिक सञ्जालमार्फत उनको मृत्युको खबर सार्वजनिक भएपछि परिवार स्तब्ध बन्यो।

मृतकका छोरा जनक देवकोटाका अनुसार भवानीप्रसाद सात वर्षपछि घर फर्किने तयारीमा थिए। श्रीमती, छोराछोरी र आफन्तसँग पुनर्मिलन गर्ने तीव्र चाहनासहित उनी नेपालतर्फ यात्रा गरिरहेका बेला हरियाणाको करनालमा भएको सडक दुर्घटनामा परी ज्यान गुमाएका हुन्। वर्षौँदेखि बुवाको प्रतीक्षामा रहेको परिवारका लागि यो खबर असह्य पीडा बनेको छ।

दुर्घटनापछि भवानीप्रसाद देवकोटाको शव हरियाणास्थित कल्पना चावला मेडिकल कलेज, करनालमा लगिएको थियो। २०२६ जुलाई १४ मा पोस्टमार्टम सम्पन्न भएपछि मृतकका छोरा जनक देवकोटा तथा अन्य पारिवारिक सदस्यहरूको उपस्थितिमा समाजसेवी माधव गौतम, कृष्णप्रसाद भट्टराई, मिलन, सन्दीपलगायत विभिन्न सामाजिक व्यक्तित्वहरूको सहयोगमा उनको अन्तिम संस्कार भावपूर्ण वातावरणमा सम्पन्न गरिएको थियो।

रोजगारीको खोजीमा विदेशिएका नेपालीहरूले यसरी बाटोमै ज्यान गुमाउनुपर्ने बाध्यताले फेरि एकपटक सम्पूर्ण प्रवासी नेपाली समुदायलाई मर्माहत बनाएको छ। सुरक्षित वैदेशिक रोजगारी र प्रवासी नेपालीहरूको सुरक्षाको विषयमा सम्बन्धित निकायले थप प्रभावकारी पहल गर्नुपर्ने आवश्यकता यस घटनाले पुनः उजागर गरेको छ।

मृतक भवानीप्रसाद देवकोटाप्रति हार्दिक श्रद्धाञ्जली तथा शोकसन्तप्त परिवारजनप्रति गहिरो समवेदना व्यक्त गरिएको छ।