काठमाडौँ । प्रगतिवादी साहित्यकार मोहनविक्रम सिंहद्वारा लिखित ‘१२ मे’ नाटक आगामी २०८३ भदौ २१ गते प्रदर्शन हुने भएको छ । भदौ २१ गते दिउसो नेपाल प्रज्ञा–प्रतिष्ठानको मुख्य हलमा उक्त नाटक प्रदर्शन हुन थालेको हो ।
उक्त कार्यक्रम व्यवस्थापन गर्नका लागि असार २३ गते सम्पन्न भेलाले ११ सदस्यीय व्यवस्थापन समिति गठन गरेको नेकपा (मसाल) का प्रवक्ता रामप्रकाश पुरीले युगदर्शनलाई जानकारी दिनुभयो ।
व्यवस्थापन समितिको संयोजकमा आनन्दराज शर्मा रहनुभएको छ भने सदस्यमा दुर्गा पौडेल, मनोज भट्ट, रामप्रकाश पुरी, भैरवराज रेग्मी, मीना पुन, निमबहादुर बुढा, हरिकान्त शर्मा, समीर सिंह, सुभाष जिसी र गिरीप्रसाद बुढा रहनुभएको छ ।
व्यवस्थापन समितिकी सदस्य दुर्गा पौडेलका अनुसार व्यवस्थापनसम्बन्धी थप निर्णय गर्नका लागि भोलि असार २७ गते समितिको बैठक बस्दैछ । सो बैठकले टिकटका दरलगायत विभिन्न विषयमा निर्णय गर्नेछ ।
पौडेलले मूल प्रवाह अखिल भारत नेपाली समाज (तत्कालीन अखिल भारत नेपाली एकता समाज) ले राष्ट्रिय पञ्चायत चुनाव बहिष्कारको पक्षमा मे १२, १९८६ मा नयाँदिल्लीमा सम्पन्न गरेको प्रदर्शन नै ‘१२ मे’ नाटकको विषयवस्तु रहेको छ ।
उक्त प्रदर्शनमा भारतीय प्रहरीले १० महिलासहित ९५ जनालाई गिरफ्तार गरी जेलचलान गरेको थियो । नयाँदिल्लीको तिसहजारी र पटियाला अदालतको आदेशअनुसार प्रदर्शनकारीलाई तीन महिनासम्म जेलमा राखिएको थियो ।
मूल प्रवाहका अध्यक्ष प्रेम पौडेलका अनुसार पटियाला कोर्टले उक्त मुद्दालाई निष्क्रिय बनाएको छ । अगस्त १८, २०११ मा उक्त मुद्दा निष्क्रिय गराइएको थियो ।
मूल प्रवाहको सन् १९८९ मा कानपुरमा सम्पन्न तेस्रो अखिल भारत सम्मेलनमा पनि उक्त नाटक प्रदर्शन गरिएको थियो ।
