खिमराज चालिसे

फतेहाबाद (भारत), २८ जुन । अखिल भारत नेपाली विद्यार्थी संघको फतेहाबाद नगर समितिको प्रथम नगर भेला आइतबार विशेष समारोहका बीच भव्य रूपमा सम्पन्न भएको छ।

भेलाको उद्घाटन गर्दै कार्यक्रमका प्रमुख अतिथि तथा मूल प्रवाहका महासचिव त्रिभुवन भट्टराई ले घरपरिवार र आफ्नो देश छाडेर नयाँ वातावरणमा अध्ययनका लागि पुगेका विद्यार्थीहरूले विभिन्न प्रकारका चुनौतीहरूको सामना गर्नुपर्ने उल्लेख गर्दै त्यस्तो अवस्थामा विद्यार्थी संगठनले बलियो अभिभावकको भूमिका निर्वाह गर्ने बताउनुभयो। उहाँले विद्यार्थीहरूलाई संगठित हुन आग्रह गर्नुभयो।

सम्बोधनका क्रममा महासचिव भट्टराईले नेपालको वर्तमान राजनीतिक परिस्थितिमा व्यापक वाम एकताको आवश्यकता औँल्याउनुभयो। विगतका गल्ती तथा कमजोरीहरूलाई सच्याउँदै अघि बढ्नुपर्ने समय आएको उल्लेख गर्दै उहाँले भन्नुभयो, “समयको माग र नेपाली श्रमिक वर्गको हितका लागि विगतका गल्ती–कमजोरीहरूलाई सच्याउँदै बृहत् वाम कार्यगत एकता कायम गर्नु आजको अपरिहार्य आवश्यकता हो।”

समारोहमा मूल प्रवाहका केन्द्रीय सदस्य तथा सुदूर पश्चिमोत्तर क्षेत्रीय अध्यक्ष तारा सोमारे ले मूल प्रवाहको गौरवमय इतिहास तथा विद्यार्थी संघसँग रहेको संगठनात्मक सम्बन्धबारे प्रकाश पार्नुभएको थियो।

भेलाद्वारा निर्वाचित पदाधिकारी तथा सदस्यहरूको प्यानल अखिल भारत नेपाली विद्यार्थी संघका सुदूर पश्चिमोत्तर क्षेत्रीय सदस्य एवं हिसार नगर अध्यक्ष लक्ष्मी रास्कोटी ले प्रस्तुत गर्नुभएको थियो।

भेलाले नविन विक को अध्यक्षतामा १५ सदस्यीय नगर समिति गठन गरेको छ। समितिको उपाध्यक्षमा विनीता थापा, सचिवमा युवराज जिसी, सहसचिवमा नेहा शर्मा तथा कोषाध्यक्षमा हिना सुनार निर्वाचित हुनुभएको छ।

त्यसैगरी सदस्यहरूमा वंशिका थापा, निखिल सुनार, पर्विन सुनार, आयुष सुनार, कार्तिक सुनार, आर्यन सुनार, जस्सन जिसी, अक्षिता लगायत निर्वाचित भएका छन्।

भेलामा मूल प्रवाह फतेहाबाद नगर समितिका अध्यक्ष केबी किशन, उपाध्यक्ष शिवलाल सुनार, सदस्य सुष्मा सुनार, सुशीला विक तथा विद्यार्थी संघका कृति बीसी, कमला थापा, सुशीला सुनार, शिवलाल सुनार र सङ्गीता ताम्राकारलगायतले शुभकामना मन्तव्य व्यक्त गर्नुभएको थियो।

कार्यक्रम नविन विकको अध्यक्षतामा सम्पन्न भएको थियो भने सञ्चालन कमला बगालेले गर्नुभएको थियो। कार्यक्रममा बाबुराम बीसीले स्वागत मन्तव्य राख्नुभएको थियो।