टोकियो । जापानको साइतामा प्रान्तस्थित कोनोसु सिटीमा एक नेपाली महिला मृत अवस्थामा फेला परेकी छन्। घटनामा संलग्न भएको आशंकामा उनका श्रीमान्लाई प्रहरीले नियन्त्रणमा लिएर अनुसन्धान अघि बढाएको छ।
जापानी सञ्चारमाध्यमहरूका अनुसार ३६ वर्षीया नेपाली महिला जुन २१ को बिहान कोनोसु सिटीस्थित एक अपार्टमेन्टको तेस्रो तलामा टाउकोबाट रगत बगेको अवस्थामा अचेत फेला परेकी थिइन्। उनलाई तत्काल अस्पताल लगिए पनि चिकित्सकले मृत घोषणा गरेका थिए।
घटनापछि बिहान करिब ७ बजे महिलाका करिब ३० वर्षीय श्रीमान् रगत लागेको कपडा लगाएर स्थानीय प्रहरी चौकी पुगेका थिए। उनको व्यवहार शंकास्पद देखिएपछि प्रहरी टोली उनको अपार्टमेन्टमा पुगेको थियो, जहाँ महिलालाई गम्भीर अवस्थामा फेला पारिएको थियो।
प्रहरीका अनुसार दम्पती सोही अपार्टमेन्टमा बस्दै आएका थिए। घटनाको कारण खुल्न नसकेको र हत्या भएको हुन सक्ने आशंकामा श्रीमान्सँग सोधपुछ तथा विस्तृत अनुसन्धान भइरहेको जनाइएको छ।
मृतक महिलाको परिचय तथा पेशासम्बन्धी विवरण सार्वजनिक गरिएको छैन।
