जुमानसिंह केसी, खलङ्गा ।
प्युठानमा रक्तिम सांस्कृतिक अभियानको ‘विशेष रक्तिम साँझ’ आगामी असार ७ गते हुने भएको छ ।
रक्तिम केन्द्रीय समितिको आयोजनामा देशव्यापी अभियानको रूपमा अघि बढेको सो कार्यक्रम प्युठानको जुम्रीस्थित होटेल आयुष्मामा हुन थालेको हो ।
रक्तिमले आम मजदुर, किसान र सर्वहारा वर्गको मुक्तिको लागि कला र संस्कृतिको माध्यमबाट सचेत गराउँदै आएको राष्ट्रिय जनमोर्चा प्युठानका अध्यक्ष ज्ञामुराम न्यौपानेले बताउनुभयो ।
सामाजिक परिवर्तनमा रक्तिमको सकारात्मक योगदान रहेको बताउँदै उहाँले विभिन्न माध्यमबाट राज्यलाई खबरदारी गर्ने काम पनि रक्तिमले गर्दै आएको दाबी गर्नुभयो ।
देशका विभिन्न जिल्लामा सांस्कृतिक कार्यक्रममार्फत सचेतना फैलाउँदै आएको र प्युठानमा असार ७ गते दिउसो १२ बजेदेखि हुने उक्त कार्यक्रममा प्युठानी आमाबुबा, दाजुभाइ तथा प्रगतिशील व्यक्तित्वहरू सबै उपस्थित भई कार्यक्रममा मनोरञ्जन लिन तथा अवलोकन गर्न हेतु सहभागी हुन राजमो नेता सुरेश थापाले अनुरोध गर्नुभयो ।
उहाँले कार्यक्रममा पाँच सयदेखि पाँच हजार रुपियाँसम्मको टिकटको व्यवस्था रहेको बताउँदै यतिखेर धमाधम टिकट बुकिङ भइरहेको जानकारी दिनुभयो ।
जेठ १६ गते काठमाडौँदेखि सुरु भएको रक्तिमको उक्त विशेष कार्यक्रम चितवन, बागलुङ, कास्की, गुल्मी, अर्घाखाँची हुँदै प्युठान पुग्दैछ । त्यसपछि सो कार्यक्रम रोल्पा, रुपन्देही हुँदै दाङमा पुगेर समापन हुनेछ ।
