काठमाडौं । साउन १२ गते काठमाडौं कपनस्थित आकाशेधाराको झाडीमा फालिएकी शिशु आमा र केयर बालगृहकी सञ्चालिकाकै मिलेमतोमा फालिएको खुलेको छ । प्रहरी अनुसन्धानका क्रममा केयर बालगृहकी संस्थापक पुष्पा अधिकारीले शिशुकी आमाकै मिलेमतोमा आफूहरुले शिशुलाई झाडीमा फालेर पछि भेटाएको नाटक गरेको स्वीकार गरेकी छन् ।

कपन चौरमा फालिएकी शिशुलाई सोही क्षेत्रमा रहेको केयर बालगृहकी संस्थापक पुष्पाले पालन पोषणको जिम्मा लिएको बताएकी थिइन् । अवैध सम्बन्धबाट जन्मिएकी ति बालिकालाई निर्दयी आमाले पैसा कमाउने लोभमा त्यासो गरेको तथ्य खुलेको छ ।

प्रहरीलाई भन्दा पहिले सञ्चारकर्मीलाई बोलाएर घटनालाई चर्चित बनाउने प्रयास गरेकी पुष्पाले ‘ति आमालाई बचाउन आफूले त्यसो गर्नुपरेको बताएकी छन् ।’

उनले सञ्चारकर्मीसँग भनिन्, ‘एउटी महिलाको पीडा महिलाले नै बुझ्छ । विदेशबाट अवैध गर्भ बोकेर आएकी ति महिलाले जन्माएको शिशुलाई पालनपोषण गरिदिनुपर्यो भनेर अनुरोध गरेपछि हामी मिलेर यस्तो योजना बनाएका हौं’ उनले अगाडि भनेकी छन्, ‘हामीले बच्चालाई कार्टुनमा राखेर झाडीमा राख्यौं । अनि नजिकै बसेर हेरेका थियौं । पछि आश्रमका बच्चाहरुलाई त्यहाँ खेल्न पठाइयो । ति बच्चाहरुले नानीलाई फेला पारे र हामीले यहाँ ल्याएका हौं ।’

कपन, आकाशेधारामा वेवारिसे भेटिएको बच्चा त नियोजित घटना पो रैछ। बैदेशिक रोजगारबाट फर्केकी एक महिलाको बच्चा नजिकैको बाल-गृहकी सञ्चालकसँगको मिलेमतोमा ‘वेवारिसे’ भएको नाटक गरिएको रैछ। ‘पैसा कमाउन यसो गरियो’ भन्ने दाबी प्रहरीको। pic.twitter.com/7WX2EDMFxM

— Narayan Amrit (@amritna) August 4, 2020

वैदेशिक रोजगारीबाट हालै सरकारको उद्धार उडानमार्फत् स्वदेश फर्केकी ति महिलाले बच्चा जन्माएको खुलेपनि महिलाको परिचय अहिलेसम्म गोप्य राखिएको छ ।

परिवारलाई खबर नगरी काठमाडौंमै कुनै संस्थामा आश्रय लिई बसेकै समयमा शिशु जन्मेपछी सहयोगीमार्फत् उनको केयर बालगृहका संस्थापकसँग भेट भएको थियो र उनैको मिलमतोमा साउन १२ गते नाटक मञ्चन गरी ति शिशुलाई कार्टुनमा राखेको खुलासा भएको हो ।

घटना उजागर भएलगत्तै केयर बालगृहका संस्थापक पुष्पा अधिकारी, ती शिशुकी आमा र सहयोगीलाई प्रहरीेले नियन्त्रणमा लिई अनुसन्धान थालेको छ ।