अर्घाखाँची, जेठ ३१ । अर्घाखाँचीको सदरमुकाम सन्धिखर्कस्थित सभाहलमा रक्तिम सांस्कृतिक अभियानद्वारा आयोजित विशेष सांस्कृतिक कार्यक्रम ‘रक्तिम साँझ–२०८३’ शनिबार भव्य रूपमा सम्पन्न भएको छ । जनवादी कला, साहित्य तथा संस्कृतिको संरक्षण, प्रवद्र्धन र सामाजिक चेतना अभिवृद्धि गर्ने उद्देश्यले आयोजित कार्यक्रममा जिल्लाका विभिन्न क्षेत्रबाट आएका दर्शकहरूको उल्लेखनीय उपस्थिति रहेको थियो ।
कार्यक्रममा रक्तिम सांस्कृतिक अभियानका केन्द्रीय कलाकारहरूले जनवादी गीत, नृत्य तथा सशक्त सन्देश बोकेको नाटक ॅयुग बोल्छ’ प्रस्तुत गरेका थिए। कलाकारहरूको जीवन्त प्रस्तुति, सन्देशमूलक गीत–संगीत र नाट्य प्रदर्शनले दर्शकहरूलाई मन्त्रमुग्ध बनाएको थियो । कार्यक्रमभर दर्शकहरूको उत्साहजनक सहभागिता तथा प्रशंसाले सभाहलको वातावरण थप उत्साहपूर्ण बनेको आयोजकले जनाएको छ।
रक्तिम सांस्कृतिक अभियानले लामो समयदेखि सांस्कृतिक आन्दोलनमार्फत समाजमा जनचेतना फैलाउने कार्य गर्दै आएको छ। पञ्चायती व्यवस्थाकै समयदेखि गाउँ–गाउँ र बस्ती–बस्तीमा पुगेर गीत, संगीत, नाटक तथा नृत्यमार्फत सामाजिक, राजनीतिक र सांस्कृतिक विषयमा जनतालाई सचेत बनाउने अभियान सञ्चालन गर्दै आएको इतिहास रहेको अभियानका प्रतिनिधिहरूले बताएका छन्।
आयोजकका अनुसार संस्कृति केवल मनोरञ्जनको माध्यम मात्र नभई समाज रूपान्तरण र चेतना विस्तारको प्रभावकारी साधन पनि हो। यही मान्यतालाई आत्मसात् गर्दै रक्तिम सांस्कृतिक अभियानले देशभर विभिन्न सांस्कृतिक कार्यक्रम आयोजना गर्दै आएको छ। काठमाडौंबाट सुरु गरिएको यस वर्षको सांस्कृतिक यात्रा अन्तर्गत विभिन्न जिल्लामा कार्यक्रम सम्पन्न गर्दै अभियान अर्घाखाँचीको सन्धिखर्क पुगेको हो।
कार्यक्रममा प्रस्तुत गीत, नृत्य तथा नाटकहरूले समसामयिक सामाजिक विषय, श्रमजीवी वर्गको जीवन, राष्ट्रिय एकता, सामाजिक न्याय तथा परिवर्तनका सन्देशहरूलाई कलात्मक ढंगले प्रस्तुत गरेका थिए। दर्शकहरूले कलाकारहरूको प्रस्तुति मन पराउँदै यस्ता कार्यक्रमले समाजमा सकारात्मक सोच, जागरण र एकताको भावना विकास गर्न महत्वपूर्ण भूमिका खेल्ने बताएका थिए ।
रक्तिम सांस्कृतिक अभियानले आगामी दिनहरूमा पनि देशका विभिन्न जिल्लाहरूमा यस्ता सांस्कृतिक कार्यक्रम सञ्चालन गर्ने जनाएको छ। आयोजकका अनुसार कला र संस्कृतिमार्फत समाजमा सकारात्मक सन्देश प्रवाह गर्दै जनचेतना अभिवृद्धि गर्ने अभियानलाई अझ सशक्त रूपमा अघि बढाइनेछ ।
सांस्कृतिक कार्यक्रमले स्थानीय दर्शकहरूमा उत्साह थप्नुका साथै कला, संस्कृति र सामाजिक चेतनाबीचको सम्बन्धलाई थप मजबुत बनाएको सहभागीहरूको भनाइ रहेको छ ।
कार्यक्रम असार ६ गते प्यूठानको जुम्री, असार ७ गते रोल्पाको सुलिचौर र असार १३ गते बुटवलमा पुगी पहिलो चरणको कार्यक्रम सम्पन्न गरिने अध्यक्ष गिरीप्रसाद बुढाले युगदर्शनलाई जानकारी दिनुभयो ।
