श्यामलाल पोखरेल,बुटवल ।
प्यूठान झिमरुक गाउँपालिका ८ टिमुरचौर निवासी मिर्गौला पीडित इश्वरादेवी रोकाको उपचार भैरहेको छ । दुवै मृगौला फेलभएपछि ५२ वर्षीया इश्वराको बुटवलको रामनगरस्थित मुटु अस्पतालमा डायलासिस भैरहेको छ । उपचारको क्रममा दुवै मिर्गौला फेल भएको पत्ता लागेपछि २५ महिनादेखि मुटु अस्पतालमा उपचार चलिरहेको छ इश्वराको ।
डायलासिसका लागि हप्ताको दुई दिन प्यूठानबाट बुटवल आउने सम्भावना नभएपछि इश्वराको परिवार डेरा लिएर बुटवलमा बस्दै आएको छ । श्रीमान जेदबहादुर र छोरी शान्ता रोकासँगै डेरामा बस्दै आएकी मिर्गौला पीडित इश्वराको परिवार अहिले आर्थिक रुपले समस्यामा परेको छ ।
आर्थिक अभावका कारण इश्वराको उपचारमा अहिले समस्या आएको छ । उनीसँग प्रयाप्त पैसा छैन । उनलाई अहिलेसम्म कसैले पनि सहयोग गरेका छैनन् । सामान्य कृषि गरेर जीविका निर्वाह गर्दै आएको रोका परिवार ठूलो धनराशी खर्च गरेर उपचार गराउन सक्ने अवस्थामा छैन ।
बुटवलमा बसेर उपचारमा लागेको रोका परिवारलाई अहिले दैनिक रुपमा खानुपर्ने औषधि र अन्य साँझ विहानको खर्च जुटाउन धौधौ भएको छ । डायलालसिस निःशुल्क भएपनि औषषिलगायत अन्य दैनिकी खर्चका लागि आर्थिक अभाव भएकाले घर फर्कने मनसाय बनाएको बताउछन् इश्वराका श्रीमान जेदबहादुर रोका ।
मासिक रुपमा औषषिका लागि ६ हजार, डेराभाडा २ हजार विद्युत पानी र अन्य खानाखर्च जुटाउन समस्या भएपछि घर फर्कने अवस्था आएको जेदबहादुर बताउँछन् ।
श्रीमतीलाई सन्चो गराउने ठूलो इच्छा बोकेर बुटवल झरेका जेदबहादुर अहिले आर्थिकको अभावले तनावमा छन् । घरमा कमाउने कोही छैनन् । तीनभाई छोरा भएपनि आमालाई कस्तो छ भनेर एक कल फोन नगर्ने छोराहरुबाट पनि कूनै आशा भरोसा नभएको दुखेसो सुनाउँछन् जेदबहादुर ।
कृषि पेशाबाट दैनिकी चलाउँदै आएको रोका परिवारले उपचारको लागि समस्या भएपछि आर्थिक र भौतिक सहयोगका लागि सबैसँग आग्रह गरेको छ । बुटवलको रामनगरमा सामान्य एक खरको झुपडीमा बस्दै आएको रोका परिवारको लागि अहिले खानको लागि पनि समस्या छ । शिलिण्डर सकिएको छ । कोठामा खानको लागि दाल चामलसमेत छैन । मृगौला पीडितलाई आवश्यक पर्ने डाइट र फलफूल त रोका परिवाारको लागि कल्पना बाहिरको सपमान बनेको छ । जसका कारण मृगौला पीडित इश्वराको परिवार अहिले ठूलो समस्यामा परेको छ ।
उपचार गर्दागर्दै घर कसरी फर्कने र बुटवल बसेर कसरी उपचार गर्ने अहिले इश्वराका श्रीमान र उनकी छोरी समस्यामा परेका छन् । आमालाई बचाउने धोको कतै पूरा नहुने पो होकी भन्ने चिन्तामा छिन् मृगौला पीडित इश्वराकी छोरी शान्ता । आमाको उपचारको लागि बुटवल रामनगरको एक सामान्य खरले छाएको सानो कोठामा बस्दै आएका उनीहरुलाई अर्को चिन्ता छ, कतै घरधनीले भाडा तिर्न नसकेर कोठाबाट निकाल्ने हुन्की भन्ने ।
कोरोना भाइरसको महामारीमा साँझ बिहानको छाक गुजार्न समस्या भएको अवस्थामा मृगौला पीडित रोका परिवारलाई गौतमबुद्ध सामूदायिक मुटु अस्पतालले १० किलो चामल, एक संस्थाले ३ किलो चामल र केही दाल र स्थानीयले सामान्य दाल चामल दिनुबाहेक उपचारका लागि खासै सहयोग पाएका छैनन् ।
मिर्गौला पीडित इश्वरालाई ठूलो समस्या परेको थाहा पाएपछि प्यूठान रुपन्देही सम्पर्क मञ्चले केही सानो तिनो सहयोग गर्ने प्रतिवद्वता जनाएको छ ।
