म्याग्दी, जेठ ३० । अन्नपूर्ण गाउँपालिकाले छोरी (शिशु) जन्म प्रोत्साहन कार्यक्रम सञ्चालन गरेको छ।
छोरीप्रति सकारात्मक सोच विकास गर्ने, लैङ्गिक समानता प्रवर्द्धन गर्ने, बालिकाको भविष्य सुनिश्चित गर्ने तथा गर्भमा लिङ्ग पहिचान गरी भ्रूण हत्या गर्ने समस्या न्यूनीकरण गर्ने उद्देश्यले उक्त कार्यक्रम सञ्चालन गरिएको हो।
अन्नपूर्ण गाउँपालिकाकी उपाध्यक्ष दिवाकुमारी तिलिजा पुनका अनुसार चालु आर्थिक वर्षमा रु. पाँच लाख बजेट विनियोजन गरी कार्यक्रम सञ्चालन गरिएको छ। सो कार्यक्रमअन्तर्गत २०८२ साउनपछि जन्मिएका छोरीका अभिभावकलाई रु. १२ हजारका दरले प्रोत्साहन रकम प्रदान गरिनेछ।
“छोरी जन्म प्रोत्साहन कार्यक्रमलाई प्रभावकारी रूपमा कार्यान्वयन गरी बालिका जन्मप्रति समाजमा सकारात्मक सन्देश प्रवाह गर्ने उद्देश्य राखिएको हो,” उहाँले भन्नुभयो, “छोरी जन्म प्रोत्साहन कार्यक्रम सञ्चालन कार्यविधि, २०८२ अनुसार चालु आर्थिक वर्ष २०८२/८३ को विनियोजित बजेटमार्फत कार्यक्रम कार्यान्वयन थालिएको छ।”
कार्यक्रमले छोरी जन्मप्रति सकारात्मक सोच विकास गर्नुका साथै बालिकाको संरक्षण, शिक्षा र सशक्तीकरणमा समेत टेवा पुग्ने अपेक्षा गरिएको छ।
प्रमुख प्रशासकीय अधिकृत कपिल पाण्डेका अनुसार २०८२ साउन १ गतेपछि जन्मिएका बालिकाका अभिभावक वा संरक्षकले असार ७ गतेसम्म आवेदन पेस गर्नुपर्नेछ।
