खिमराज चालिसे, भारत
हरियाणाको भिवानीस्थित तोसाम–खानक क्षेत्रमा कार्यरत एक नेपाली श्रमिक गम्भीर दुर्घटनामा परेका छन्। दुर्घटनापछि क्रेसर मालिकले देखाएको गैरजिम्मेवार र अमानवीय व्यवहारका कारण घाइते श्रमिकको अवस्था झन् चिन्ताजनक बनेको बताइएको छ।
गत ४ जुन २०२६ मा क्रेसरमा खाना पकाउने काम गर्दै आएका नेपाली श्रमिक कविराज सैजाल कर्मचारीहरूका लागि खाना बनाउने क्रममा आवश्यक सामग्री किन्न नजिकैको पसल गएका थिए। पसलबाट फर्किने क्रममा उनी क्रेनको चपेटामा परेका थिए। क्रेनले किच्दा उनको दाहिने खुट्टा घुँडामुनिबाट गम्भीर रूपमा क्षतिग्रस्त भएको थियो।
दुर्घटनापछि स्थानीय समुदायको दबाबमा क्रेसर मालिकले उनलाई हिसारस्थित जिन्दल अस्पतालमा उपचारका लागि पुर्याएका थिए। अस्पतालमा शल्यक्रिया गर्नुपरेको र उनको दाहिने खुट्टा काट्नुपरेको थियो। करिब एक सातासम्म उपचारका क्रममा रहँदा खुट्टा गुमाएका कविराजको मानसिक अवस्था समेत प्रभावित भएको बताइएको छ।
तर, पीडित पक्षका अनुसार गत ११ जुन २०२६ मा जिन्दल अस्पताल प्रशासन र क्रेसर मालिकले परिवारका सदस्यहरूलाई दबाब दिँदै जबर्जस्ती हस्ताक्षर गराएर कविराजलाई अस्पतालबाट डिस्चार्ज गराएका छन्। हाल उनलाई हिसारको सिभिल अस्पतालमा भर्ना गरिएको भए पनि त्यहाँ आवश्यक र प्रभावकारी उपचार हुन नसकेको आरोप लगाइएको छ।
यस घटनाको कडा शब्दमा निन्दा गर्दै मूल प्रवाह अखिल भारत नेपाली एकता समाजले घोर विरोध जनाएको छ। मूल प्रवाहका केन्द्रीय सदस्य तथा सुदूरपश्चिमोत्तर क्षेत्रीय अध्यक्ष तारा सोमारेले युगदर्शनसँग कुरा गर्दै दुःख व्यक्त गरे, “हामी मालिकहरूको थालमा स्वादिलो खाना पुर्याउँदासम्म मात्र राम्रा र बहादुर ठहरिने रहेछौँ। जब शरीरले काम गर्न सक्दैन, तब भारी बोक्न नसक्ने गधा वा खच्चरलाई भीरबाट खसालेझैँ व्यवहार गरिँदो रहेछ।”
पीडितलाई न्याय दिलाउन तथा पूर्ण उपचार सुनिश्चित गर्न मूल प्रवाहको टोली आजै दुर्घटनास्थल खानकतर्फ प्रस्थान गरेको छ। संगठनले स्थानीय प्रहरी प्रशासन र क्रेन मालिकसँग प्रत्यक्ष भेटघाट गरी कविराज सैजालको सम्पूर्ण उपचार खर्च व्यहोर्न लगाउने तथा उचित क्षतिपूर्ति दिलाउन सशक्त पहल थाल्ने निर्णय गरेको जानकारी तारा सोमारेले दिएका छन्।
संगठनले श्रमिकको जीवन र स्वास्थ्यप्रति गरिएको लापरवाहीको निष्पक्ष छानबिन गरी दोषीमाथि कानुनी कारबाही गर्नसमेत सम्बन्धित निकायसँग माग गरेको छ।
