पाल्हीनन्दन (नवलपरासी), २८ जेठ । पश्चिम नवलपरासीका किसान अहिले धान रोपाइँमा व्यस्त भएका छन्। गण्डक नहरमा समयमै पानी उपलब्ध भएपछि रामग्राम नगरपालिका, सरावल र पाल्हीनन्दन गाउँपालिकाका खेतहरूमा रोपाइँ तीव्र बनेको हो।
नहरको पानी भरिएसँगै किसानहरूले वर्षा ढिलो भए पनि खेती नरोकिने भन्दै रोपाइँ सुरु गरेका छन्। पाल्हीनन्दन–४ का किसान रामसिंह कुर्मीका अनुसार मल अभाव र मजदुरको कमी भए पनि पानी समयमै आएपछि रोपाइँ गर्न बाध्य हुनुपरेको छ।
“मलको अभाव र जनशक्ति कम भए पनि पानी आयो भनेर ढिला गर्न सकिएन,” उहाँले भन्नुभयो। उहाँका अनुसार धेरै किसानले छोटो अवधि (छिटो पाक्ने) बीउ प्रयोग गरेर रोपाइँ थालेका छन्।
त्यस्तै, अर्का किसान त्रिभुवन कुर्मीले छिमेकी किसानहरू रोपाइँमा लागेपछि खेतमा ट्याक्टर सञ्चालन प्रभावित हुने डरले छिटो बीउ नै रोप्नुपरेको बताउनुभयो।
पश्चिम गण्डक नहरका प्रमुख तिलकराम बुढाथोकीका अनुसार ३२ किलोमिटर लामो नहरमा ३६ घण्टाभित्र पानी पूर्ण रूपमा प्रवाह भएपछि आसपासका क्षेत्रमा सिँचाइ सहज भएको छ, जसको प्रत्यक्ष लाभ किसानले लिएका छन्।
स्थानीय तहमा अहिले नहरको उत्तर र दक्षिण दुवै क्षेत्रमा धान रोपाइँ तीव्र रूपमा भइरहेको छ। तर मल अभाव, श्रमिक कमी र मौसमी अनिश्चितताले किसानहरूमा केही चिन्ता भने कायमै रहेको देखिन्छ।
