काठमाडौँ, जेठ २८ — नेपालमा हाल उपल्लो वायुमण्डलमा सक्रिय पश्चिमी चापीय रेखा तथा स्थानीय वायुको प्रभाव कायम रहेकाले आज देशभर सामान्यदेखि आंशिक बदली रहने मौसमविद्ले बताएका छन्।
जल तथा मौसम विज्ञान विभागका अनुसार बुधबार अधिकांश क्षेत्रमा हल्का वर्षा भएको थियो भने आज पनि मौसमको प्रभाव जारी रहनेछ। विभागले कोशी, बागमती, गण्डकी र लुम्बिनी प्रदेशका हिमाली तथा पहाडी भू–भागका केही स्थानमा मेघगर्जन तथा चट्याङसहित मध्यम वर्षाको सम्भावना रहेको जनाएको छ।
यस्तै, मधेस प्रदेशसहित कोशी, बागमती र गण्डकी प्रदेशका तराई क्षेत्र, कर्णाली र सुदूरपश्चिम प्रदेशका हिमाली तथा पहाडी भू–भागका थोरै स्थान, साथै लुम्बिनी र सुदूरपश्चिम प्रदेशका तराईका एक–दुई स्थानमा पनि वर्षा हुने सम्भावना रहेको छ।
उच्च पहाडी तथा हिमाली क्षेत्रमा हल्का हिमपातसमेत हुन सक्ने विभागको अनुमान छ। सम्भावित वर्षा, चट्याङ तथा खराब मौसमका कारण दैनिक जनजीवन, कृषि, सडक तथा हवाई यातायातमा आंशिक प्रभाव पर्न सक्ने भएकाले आवश्यक सतर्कता अपनाउन विभागले आग्रह गरेको छ।
(रासस)
