खिमराज चालिसे
चण्डीगढ, जुन १० ।
भारतको चण्डीगढमा लामो समयदेखि आर्थिक अभाव र गम्भीर स्वास्थ्य समस्यासँग संघर्ष गरिरहेका दुई नेपाली अशक्त वृद्ध दम्पतीको उद्धार गरी स्वदेश पठाइएको छ। श्रम गरेर जीवन निर्वाह गरिरहेका तर रोग, गरिबी र सामाजिक असुरक्षाको मारमा परेका उनीहरूको उद्धार मूल प्रवाह अखिल भारत नेपाली एकता समाजको पहल तथा रारा टुरिजम (सगरमाथा टुर एण्ड ट्राभल्स) को मानवीय सहयोगमा सम्पन्न भएको हो।
उद्धार गरिएका दम्पती लमजुङ जिल्ला, मध्यनेपाल नगरपालिका–१० निवासी ६६ वर्षीय देवीप्रसाद दुरा र उनकी ६१ वर्षीया श्रीमती बालिका दुरा हुन्।
देवीप्रसाद दुरा लामो समयदेखि भारतको हिमाचल प्रदेशस्थित बद्दी क्षेत्रमा मजदुरी तथा चौकीदारीको काम गर्दै आएका थिए। तर दुई वर्षअघि पक्षाघात (प्यारालाइसिस) भएपछि उनी शारीरिक रूपमा अशक्त बनेका थिए। स्वास्थ्य अवस्था कमजोर बन्दै गएपछि उनले आफ्नो रोजगारीसमेत गुमाउनुपरेको थियो। अर्कोतर्फ, उनकी श्रीमती बालिका दुरा पनि मिर्गी रोगबाट पीडित छिन्।
परिवारको आम्दानीको स्रोत बन्द भएपछि दम्पतीको जीवन झन् कष्टकर बन्दै गएको थियो। दैनिक छाक टार्न, औषधोपचार गर्न र बसोबास गरिरहेको कोठाको भाडा तिर्नसमेत उनीहरू असमर्थ भएका थिए। श्रमजीवी तथा विपन्न नेपाली आप्रवासीहरूको यही पीडादायी अवस्थालाई मध्यनजर गर्दै मूल प्रवाह अखिल भारत नेपाली एकता समाजले उनीहरूको उद्धार प्रक्रिया अघि बढाएको थियो।
मूल प्रवाहको आग्रहलाई स्वीकार गर्दै रारा टुरिजमले मानवीय उत्तरदायित्व निर्वाह गर्दै ती दम्पतीलाई चण्डीगढबाट नेपाल–भारत सीमा कृष्णनगरसम्म निःशुल्क यातायात सुविधा उपलब्ध गराएको थियो। सोही व्यवस्थाअनुसार आज दुवै जनालाई सुरक्षित रूपमा स्वदेश फर्काइएको छ।
