काठमाडौं । पशुपति आर्यघाटमा जलाउन लागिएको एउटा शव प्रहरीले नियन्त्रणमा लिएको छ । शवलाई दागबत्ति दिन खोज्ने छोरा पक्राउ परेका छन् ।
मृतक ललितपुरको गोदावरीका ५० वर्षीय कृष्ण नेपालीको शव जलाउन खोज्ने छोरा ३० वर्षीय सन्तोषलाई शनिबार प्रहरीले पक्राउ गरेको हो । बुवाको हत्या गरी शव जलाउन खोजेको आशंकामा प्रहरीले उनलाई नियन्त्रणमा लिएर अनुसन्धान सुरु गरेको प्रहरी परिसर ललितपुरले जनाएको छ ।
‘कुटपिटबाट बुवाको मृत्यु भएको रहेछ । हामीले सन्तोषलाई नियन्त्रणमा लिएर अनुसन्धान गरिरहेका छौं’ परिसरका प्रवक्ता डीएसपी सन्तोष तामाङले सोमबार युगदर्शनसँग भन्नुभयो, ‘उसले कुटपिट गरेको स्वीकार गरेको छ । अहिले ७ दिनको म्याद थप गरेर घटनाबारे अनुसन्धान भइरहेको छ ।
प्रहरीले मृतकको शवलाई पोष्टमार्टमका लागि पठएको उहाँले जानकारी दिनुभयो । शव पोष्टमार्टम भइसकेको छ । तर रिपोर्ट आउन बाँकी छ ।
बिहीबार बुवा छोराको झगडा भएको स्थानीयले देखेका थिए । त्यसक्रममा छोराको कुटाइबाट घाइते भएका कृष्णलाई उपचारका लागि सन्तोषले छाउनीस्थित सेनाको अस्पताल पुर्याएका थिए । त्यहाँबाट शव वाहनमा बुवाको शव लिएर सिधै पशुपति आर्यघाट लगेका थिए ।
उनले बुवाको मृत्यु भएको भन्दै गाउँलेलाई मलामी बोलाएका थिए । गाउँलेहरु मलामी नगई प्रहरीलाई खबर गरेका थिए ।
