खिमराज चालिसे
भारत । भारतको पञ्जाब राज्यस्थित जालन्धरमा आयोजित विद्यार्थी, महिला तथा सांस्कृतिक प्रशिक्षण कार्यक्रमलाई सम्बोधन गर्दै मूल प्रवाह अखिल भारत नेपाली एकता समाजका महासचिव त्रिभुवन भट्टराईले नेपालको सीमा अतिक्रमण र वैदेशिक हस्तक्षेपविरुद्ध अन्तर्राष्ट्रिय अदालतसम्म जानुपर्ने आवश्यकता औँल्याउनुभएको छ।
शनिबार, ७ जुन २०२६ मा सम्पन्न कार्यक्रममा प्रमुख अतिथिका रूपमा सम्बोधन गर्दै महासचिव भट्टराईले राष्ट्रिय स्वाधीनता र सार्वभौमिकताको रक्षाका लागि कानुनी तथा अन्तर्राष्ट्रिय स्तरको संघर्षलाई सशक्त बनाउन ढिलाइ गर्न नहुने बताउनुभयो।
उहाँले भन्नुभयो, “नेपालको सीमा अतिक्रमण र आन्तरिक मामिलामा हुने हस्तक्षेपको शृङ्खला अन्त्य गर्न नेपाल दृढतापूर्वक अन्तर्राष्ट्रिय मञ्चहरूमा उभिनुपर्छ। आवश्यक परे अन्तर्राष्ट्रिय अदालतको ढोका ढकढक्याउन पनि पछि हट्नु हुँदैन।”
महासचिव भट्टराईले भारतमा विद्यार्थी सङ्गठनको आवश्यकता, महिला विभागको भूमिका तथा सांस्कृतिक विभागको महत्त्वलगायतका विषयमा प्रशिक्षण दिनुभएको थियो।
प्रशिक्षण कार्यक्रममा प्रवासमा रहेका नेपाली विद्यार्थी, महिला तथा सांस्कृतिक क्षेत्रमा क्रियाशील व्यक्तिहरूको उल्लेखनीय सहभागिता रहेको थियो।
कार्यक्रममा मूल प्रवाहका केन्द्रीय सचिव तथा सुदूरपश्चिमोत्तर क्षेत्रीय सचिव कुलबहादुर बगाले र मूल प्रवाहका केन्द्रीय वैकल्पिक सदस्य एवं समता विभागका केन्द्रीय संयोजक धनबहादुर गोर्खालीको विशेष आतिथ्यता रहेको थियो।
कार्यक्रम सुष्मा खडकाको अध्यक्षता र लक्ष्मण खडकाको सञ्चालनमा सम्पन्न भएको थियो ।
