काठमाडौँ । राष्ट्रिय जनमोर्चाका केन्द्रीय सल्लाहकार आनन्द शर्माकी आमा कौशिला पाध्याको कालीगण्डकी किनारमा दाहसंस्कार गरिएको छ ।
२०८३ जेठ २४ गते आइतबार बागलुङ जैमिनी नगरपालिका–७ स्थित सुम्सा दोबिल्लाघाटमा उहाँको दाहसंस्कार गरिएको हो ।
राजमो गण्डकी प्रदेश समितिका उपाध्यक्ष तथा राजमो बागलुङका कार्यालय सचिव धर्म कुँवरले दाहसंस्कारअघि कौशिलाको पार्थिव शरीरमा पार्टीको झन्डा ओढाउनुभएको थियो ।
घाटमा सङ्क्षिप्त शोकमन्तव्य राख्दै कुँवरले स्मृतिशेष कौशिलाको सकारात्मक सोच तथा व्यवहारले नेकपा (मसाल) को राजनीतिलाई अगाडि बढाउन मदत पुगेको बताउनुभयो ।
दाहसंस्कार स्थलमा राजमो केन्द्रीय सदस्य लीलादेवी कुँवर, अखिल नेपाल महिला सङ्घकी केन्द्रीय उपाध्यक्ष लक्ष्मी बासकोटा, अखिल नेपाल जनजाति सम्मेलनका केन्द्रीय उपाध्यक्ष केबी थापा, राजमो बागलुङका सचिवालय सदस्य थानेश्वर सुवेदीलगायत मसालसम्बद्ध नेता, परिवारजन र गाउँवासीको उपस्थिति थियो ।
२००६ भदौ ५ गते तत्कालीन जैमिनीकै छिस्तीमा जन्मिनुभएका कौशिलाको जेठ २३ गते महाराजगञ्जस्थित त्रिवि शिक्षण अस्पतालमा निधन भएको थियो ।
जैमिनीको जैदीस्थित निवासमै रहेका बेला ब्रेन ह्यामरेज भएपछि उहाँलाई थप उपचारका लागि काठमाडौँ ल्याइएको थियो ।
उहाँको परिवारमा चार भाइ छोरा र चार बुहारी रहेका छन् । राजमो नेता आनन्द शर्मा जेठो छोरा हुनुहुन्छ भने जेठी बुहारी सुधा शर्मा पनि राजमो केन्द्रीय सदस्य हुनुहुन्छ । परिवारमा माहिलो छोरा उपेन्द्र शर्मा, साहिलो छोरा नेत्रनाथ शर्मा र कान्छा योगराज उपाध्याय, बुहारी, पाँच नाति र २ नातिनी रहनुभएको छ । कौशिलाकी पति विष्णुदत्त पाध्याको केही वर्षअघि निधन भइसकेको छ ।
