काठमाडौँ । राष्ट्रिय जनमोर्चा रोल्पाका उपाध्यक्ष धनप्रसाद बुढामगर दुर्घटनामा परी घाइते हुनुभएको छ ।
राजमो रोल्पाका अध्यक्ष मेघनाथ विष्टले दिनुभएको जानकारीअनुसार उपचारका लागि काठमाडौँ जाने क्रममा उहाँ दुर्घटना पर्नुभएको हो ।
२०८३ जेठ २१ गते काठमाडौँ आउने क्रममा तनहुँ जिल्ला म्याग्दे गाउँपालिकाको मनहरी भन्ने स्थानमा ट्रक र एम्बुलेन्स एक आपसमा ठोक्किँदा ५९ वर्षीय बुढामगरसँगै उहाँकी ६० वर्षीया पत्नी जुनराखी बुढामगर, ४० वर्षीया छोरी जितमाया घर्तीमगर, २९ वर्षीया बुहारी अन्जु रोकामगर र ३ वर्षीय नाति युनान बुढामगर दुर्घटनामा पर्नुभएको थियो ।
जेठ २१ गतेकै दिन आफ्नै बारीको ढिकबाट लडेर घाइते भएपछि उहाँलाई पहिला थबाङ जिल्ला अस्पताल पुर्याइएको थियो । त्यहाँ उपचार सम्भव नभएपछि थप उपचारका लागि थबाङ अस्पतालले काठमाडौँ रेफर गरेको थियो ।
यतिखेर घाइते सम्पूर्णको त्रिवि शिक्षण अस्पताल महाराजगञ्जमा उपचार भइरहेको छ ।
यसैबिच जिल्ला अध्यक्ष विष्टले जेठ २३ गते प्रेसविज्ञप्ति जारी गर्दै घाइते बुढामगर परिवारप्रति शीघ्र स्वास्थ्यलाभको कामना व्यक्त गर्नुभएको छ ।
घाइतको उपचारका लागि सहयोग गर्ने सबैलाई धन्यवाद ज्ञापन गर्दै सो विज्ञप्तिमा उपचार सम्पन्न गर्न थप सहयोगको अपिलसमेत गर्नुभएको छ ।
