खिमबहादुर विक
नागपुर । पर्वत जिल्लाको कुश्मा नगरपालिका–३ निवासी २७ वर्षीय सूर्य दमाईको दुर्घटनामा निधन भएपछि मूल प्रवाह अखिल भारत नेपाली एकता समाज, नागपुर नगर समितिको रोहवरमा दाहसंस्कार सम्पन्न गरिएको छ।
परिवारलाई भेट्न गोरखपुरबाट चेन्नई हुँदै तमिलनाडुको उटी जाँदै गरेका सूर्य दमाईको २०८३ जेठ १५ गते (२९ मे २०२६) महाराष्ट्र राज्यको नागपुरबाट करिब ४० किलोमिटर अगाडि कलमेश्वर रेलवे स्टेसन नजिक रेल दुर्घटनामा परी मृत्यु भएको थियो। घटनाबारे रेलवे प्रहरीले मूल प्रवाह अखिल भारत नेपाली एकता समाज, नागपुर नगर समितिका सहसचिव अशोकराज शर्मा र दुर्गाबहादुर पार्देलाई जानकारी गराएको थियो।
जानकारी प्राप्त भएपछि नगर अध्यक्ष ईश्वर पुन र सचिव मंगल पुनले रेलवे प्रहरीसँग समन्वय गरी मृतकको नागरिकता तथा अन्य आवश्यक विवरण प्राप्त गरेका थिए। त्यसपछि नगर अध्यक्ष पुनले मूल प्रवाह मध्य–दक्षिण क्षेत्रीय समितिका अध्यक्ष खिमबहादुर विकलाई घटनाबारे जानकारी गराउँदै आवश्यक परामर्श लिएका थिए। साथै, केन्द्रीय अध्यक्ष प्रेम पौडेलसँग सम्पर्क गरी आवश्यक सहयोगका लागि अनुरोध गरिएको थियो।
केन्द्रीय अध्यक्ष पौडेलले दक्षिण भारत क्षेत्रीय समिति तथा नेपालस्थित सम्बन्धित पक्षहरूसँग समन्वय गरी मृतकका आफन्तलाई घटनाबारे जानकारी गराउन सफल भएका थिए। त्यसपछि २०८३ जेठ १७ गते (३१ मे २०२६) मृतकका आमा, बुबा, दाइ, श्रीमती तथा अन्य आफन्तहरू तमिलनाडुको उटी र नेपालबाट नागपुर पुगेका थिए।
मूल प्रवाह नागपुर नगर समितिको सहयोगमा रेलवे प्रहरी र अस्पतालसम्बन्धी सम्पूर्ण कानुनी प्रक्रिया पूरा गरी परिवारजनको उपस्थितिमा मृतक सूर्य दमाईको दाहसंस्कार सम्पन्न गरिएको हो।
उल्लेखनीय छ, सूर्य दमाई केही दिनअघि मात्र दुबईबाट नेपाल आएका थिए र परिवारलाई भेट्न तमिलनाडुको उटीतर्फ जाँदै गर्दा उक्त दुःखद दुर्घटनामा परेका थिए।
मूल प्रवाह मध्य–दक्षिण क्षेत्रीय समितिले दिवंगत सूर्य दमाईप्रति हार्दिक श्रद्धाञ्जली अर्पण गर्दै शोकाकुल परिवारजनप्रति गहिरो समवेदना व्यक्त गरेको छ।
