जगत प्रसाद रेग्मी

हामी नेपाली झुक्न जानेनौँ
न त हामी कसैको गुलाम हुन नै जान्यौँ
बैरी आउँदा भागेनौँ, बरु सामना गर्न तयार भयौँ
साम्राज्य स्वीकार भएन, बरु बलिदान दियौँ
हाम्रो पुर्खा बहादुर त्यसै भएको होइन
नत्र त बाङ्गा–बलिया सबै बहादुर हुन्थे
त्यो हामी नेपालीको शान, अनि स्वाभिमान हो
झुट, लुट, घमण्ड इष्र्या, अनि व्यभिचार जानेनौँ
सिधा वफादार, अनि कर्तव्यबोध अकाट्य चरित्र
साहस त हाम्रो पहिचान हो ।

मर्न सक्छौ तर कायरता स्वीकार छैन
त्यसैले त हामी मानवजातिसामु
वीर बहादुर नेपाली भएका छौँ
बहादुरितालाई कायरतामा बदल्न खोजिँदै छ
सानु ठुलो त र म भन्ने सिकाइँदै छ
जात, जातिवाद र क्षेत्रीयता
हाम्रो पहिचान भनेर बहादुरिपन नाश हुँदै छ
कसैको स्वार्थमा हामी विभक्त हुँदै छौँ
हाम्रो स्वभिमान गुम्दै छ
पराइको रणमैदान बनाउन
पैसामा हाम्रो स्वाभिमान किन्न खोज्दै छन् ।

खबरदार !
नेपालीको तातो रगत जीवितै छ
अमरसिंह, बलभद्र, कालु पाण्डेका सन्तान
विदेशीको गन्ध मन पर्दैन रत्तिभर
उम्लिन्छ बाफ आउने गरी रगतको तरङ्ग
मेरो छेउकुना तलमाथि चारैतिर कतै पनि
कोतर्न खोज्ने त्यो खुनी साम्राज्य
अब चल्दैन, झुक्दैन हाम्रो शिर तेरोसामु
अब उठ्न थाल्यो पूर्वको मानेभञ्ज्याङ
पश्चिमको लिम्पियाधुरा
गाउँगाउँबाट जुर्मुराउन थाले
देशका लागि बली दिन ।

सप्तरीका यादव हुन् या कञ्चनपुरका गौतम
राष्ट्र छ र त हामी छौँ
वीर छौँ, अनि नेपाली छौँ
अब उठ्नुपर्छ जुट्नुपर्छ
जन्म दिने आमा र जन्मेको भूमि
बचाउनु छ साम्राज्यवादसँग
फिर्ता लिनु छ मेरो भूमि
जस्तोसुकै आहुति दिनुपरे पनि
एक पाइला अनि एक चिम्टी माटो
न हाम्रो दिन्छौं, न त कसैको लिन्छौँ ।

वीर नेपाली झुक्न, अनि लाचार हुन
कसैको शरणमा बस्न कहिल्र्य पनि जानेनौँ
त्यसैले त विश्वमा वीर छौं
वीरता छ, स्वाभिमान छ
त्यसैले त विश्वमा वीर छौँ
वीरता छ, स्वाभिमान छ ।

कसैले धर्तीसँग सौदा गर्छ भने
नाइके बन्न सम्झौता गर्छ भने
कलो खाई ज्यान बनाउन सोच्छ भने
सत्ताभन्दा देश ठुलो कसैले मान्दैन भने
चाहे त्यो बिप्पा होस या एमसिसी
राष्ट्रघाती देशभक्त हुनै सक्दैन
जति नाटक खेले पनि
भ्रम त केही दिन
र, केहीलाई दिन सकौँला
देशभक्त झुक्दैनन्, न त लम्पसार नै हुन्छन्
त्यसैले वीर नेपाली हामी
विदेशीको हस्तक्षेप स्वीकार छैन
गुलामी, उपनिवेश हामीले जानेनौँ
रैती बनाउन कोही आउँछ भने
कुर्सी थाम्न मातृभूमि दाउमा राख्न खोज्छ भने
हामी करोडौँ नेपाली ज्वारभाटा बनेर उठ्ने छौं
दुश्मनलाई खरानी बनाउने छौं अग्निज्वाला बनेर
विदेशी प्रभुसामु कहिल्यै झुक्ने छैनौँ
बारुद बनेर पड्कने छौ वीर हामी
वीर हामी नेपाली ।