काठमाडौँ, जेठ २० । मूल प्रवाह अखिल भारत नेपाली एकता समाज, दक्षिण भारत क्षेत्रीय समितिको १२औँ नियमित बैठकले विभिन्न महत्वपूर्ण संगठनात्मक निर्णयहरू गरेको छ ।
समितिद्वारा जारी विज्ञप्तिअनुसार बैठक २०८२ जेठ १८ गते अध्यक्ष चन्द्रबहादुर थापाको अध्यक्षतामा सम्पन्न भएको छ । बैठकमा केन्द्रीय अध्यक्ष प्रेम पौडेल तथा केन्द्रीय कोषाध्यक्ष चन्द्रकान्त शर्माको विशेष उपस्थिति रहेको थियो ।
अध्यक्ष चन्द्रबहादुर थापाद्वारा अन्य संगठनात्मक कार्यव्यस्तताका कारण अध्यक्ष पदबाट अलग हुने प्रस्ताव पेश गरेपछि उक्त प्रस्ताव बैठकले अनुमोदन गरेको छ ।
साथै, हालसम्म सचिवको जिम्मेवारी सम्हाल्दै आएका जनकराज पौडेल (पाण्डेचरी) लाई सर्वसम्मत रूपमा दक्षिण भारत क्षेत्रीय समितिको अध्यक्षमा चयन गरिएको विज्ञप्तिमा उल्लेख गरिएको छ । त्यसैगरी, जनकराज पौडेल अध्यक्षमा चयन भएपछि रिक्त भएको सचिव पदमा सचिवालय सदस्य काशिरामा शर्मा (चेन्नई, उत्तर) लाई मनोनयन गरिएको छ ।
बैठकले सदस्यता अभियानलाई तीव्र बनाउने, संगठन विस्तार तथा पुनर्गठन कार्यलाई प्रभावकारी रूपमा अगाडि बढाउने र संगठनलाई अझ सुदृढ एवं सक्षम बनाउने निर्णयसमेत गरेको जनाएको छ ।
यसैबीच, विज्ञप्तिमा नेपाल सरकारका प्रधानमन्त्री बालेन शाहले हालै दिएको अभिव्यक्तिप्रति दक्षिण भारत क्षेत्रीय समितिले गम्भीर ध्यानाकर्षण भएको उल्लेख गरेको छ । समितिले उक्त अभिव्यक्तिलाई गैरजिम्मेवार, अपरिपक्व, तथ्यहीन र आम नेपाली जनताको भावनाविपरीत भएको टिप्पणी गर्दै असहमति जनाएको छ ।
विज्ञप्तिको अन्त्यमा संगठनले सबै सदस्य तथा शुभेच्छुकहरूलाई एकता र सहकार्यको भावनाका साथ संगठन निर्माणमा लाग्न आह्वान गरिएको छ ।
