काठमाडौं, जेठ १९ । भारतमा क्रियाशील सामाजिक संगठन मूल प्रवाह अखिल भारत नेपाली एकता समाजले प्रधानमन्त्री बालेन शाहले प्रतिनिधिसभामा दिएको अभिव्यक्तिप्रति गम्भीर आपत्ति जनाएको छ ।
समाजका अध्यक्ष प्रेम पौडेलद्वारा सोमबार जारी प्रेस वक्तव्यमा प्रधानमन्त्रीले प्रतिनिधिसभामा सांसदहरूले उठाएका प्रश्नहरूको जवाफ दिने क्रममा “नेपालले पनि भारतको सीमा मिचेको छ” भन्ने आशयको अभिव्यक्ति दिएको भन्दै त्यसप्रति आफ्नो गम्भीर ध्यानाकर्षण भएको उल्लेख छ ।
वक्तव्यमा भारतले कालापानी, लिपुलेक र लिम्पियाधुरालगायत नेपाली भूभाग अतिक्रमण गरी कब्जा जमाएको विषय सर्वविदित रहेको उल्लेख गरिएको छ । साथै, देशका विभिन्न सीमावर्ती क्षेत्रमा पटक–पटक अतिक्रमणका घटना हुँदै आएको भन्दै कब्जामा रहेको नेपाली भूमि फिर्ता गराउनु तथा राष्ट्रिय सीमाको रक्षा गर्नु सरकारको प्रमुख दायित्व भएको समाजको भनाइ छ ।
यस्तो संवेदनशील विषयमा सरकार प्रमुखबाट आएको अभिव्यक्तिलाई गैरजिम्मेवार तथा राष्ट्रहितविपरीत भएको दाबी गर्दै समाजले उक्त भनाइको कडा शब्दमा भत्र्सना गरेको छ । समाजले आफ्नो स्थापना कालदेखि नै राष्ट्रियता, जनतन्त्र र जनजीविकाका पक्षमा निरन्तर संघर्ष गर्दै आएको पनि वक्तव्यमा उल्लेख गरेको छ ।
समाजले राष्ट्रियता र लोकतन्त्रको रक्षाका लागि देश तथा विदेशमा रहेका सम्पूर्ण लोकतान्त्रिक र राष्ट्रवादी शक्तिहरूलाई एकजुट भई संघर्षमा उत्रिन विशेष आह्वान गरेको छ ।
