खिमराज चालिसे
चण्डीगढ, १ जुन २०२६ ।
मूल प्रवाह अखिल भारत नेपाली एकता समाजका महासचिव त्रिभुवन भट्टराईले प्रवासी नेपालीहरूको पूर्ण मताधिकार तथा राज्यका सबै संरचनामा समानुपातिक प्रतिनिधित्व सुनिश्चित गरिनुपर्ने बताउनुभएको छ।

पञ्जाब राज्यको लुधियानामा ३१ मे २०२६ मा आयोजित मूल प्रवाहका विभिन्न विभागहरूको संयुक्त भेलालाई सम्बोधन गर्दै महासचिव भट्टराईले देशको अर्थतन्त्र धान्न महत्त्वपूर्ण भूमिका निर्वाह गरिरहेका लाखौँ प्रवासी नेपालीहरूलाई राज्यको मूलधार र नीति निर्माण प्रक्रियाबाट अलग राख्न नहुने धारणा व्यक्त गर्नुभयो।

उहाँले रेमिट्यान्समार्फत देशको अर्थतन्त्रलाई संकटबाट जोगाइरहेका प्रवासी नेपालीहरूलाई मतदानको अधिकारबाट वञ्चित गरिनु न्यायोचित नहुने बताउँदै आगामी नीति निर्माण तथा संविधान संशोधन प्रक्रियामा पनि प्रवासी नेपालीहरूको मताधिकार र समानुपातिक प्रतिनिधित्वको ग्यारेन्टी गरिनुपर्नेमा जोड दिनुभयो।

भेलामा समसामयिक विषयहरूमा छलफलपछि मूल प्रवाह नगर समिति तथा विभिन्न विभागहरूको गठन गरिएको घोषणा मूल प्रवाहका केन्द्रीय सदस्य एवं सुदूर पश्चिमोत्तर क्षेत्रीय अध्यक्ष तारा सोमरेले गर्नुभयो।

भेलाले पशुपति पोख्रेलको अध्यक्षतामा २५ सदस्यीय नगर समिति गठन गरेको छ। समितिमा चक्रबहादुर चन्द उपाध्यक्ष, गोविन्द परियार सचिव, भगतसिंह विक सहसचिव तथा राजु पौडेल कोषाध्यक्ष चयन हुनुभएको छ। अन्य सदस्यहरूमा खुमबहादुर थापा, रामचन्द्र पौडेल, राजकुमार शाही, कैलाश खड्का, उदयसिंह चन्द, दीपा चन्द, टेकसिंह चन्द, माधव भट्टराई, नारायण पोखरेल, हुमबहादुर राना, नरबहादुर विकलगायत रहनुभएको छ भने एक सदस्य पद रिक्त राखिएको छ।

त्यसैगरी दिनेश बस्नेत, वीरेन्द्र चन्द, पार्वती चन्द र धौली विक वैकल्पिक सदस्य चयन हुनुभएको छ । सल्लाहकारहरूमा निर्मला परियार, निर्मला विक, खेमराज पोखरेल तथा एक स्थान रिक्त रहेको छ ।

महिला नगर विभाग

भेलाले दीपा चन्दको संयोजकत्वमा नौ सदस्यीय महिला नगर विभाग गठन गरेको छ। विभागमा पार्वती चन्द, धौली विक, निर्मला विक, निर्मला परियार, पिंकी बिष्ट, पुष्पा खनाल र राधा बस्नेत सदस्य रहनुभएको छ।

यस्तै, अखिल भारत नेपाली विद्यार्थी सङ्घतर्फ टेकसिंह चन्दको अध्यक्षतामा नौ सदस्यीय विद्यार्थी समिति गठन गरिएको छ। समितिमा मनिसिंह चन्द सचिव चयन हुनुभएको छ भने सुसान्त विक, शीतल, सीमा, भावना र गोनिसा परियार सदस्य रहनुभएको छ। एक सदस्य पद रिक्त राखिएको छ।

चक्र चन्दको अध्यक्षतामा सम्पन्न कार्यक्रममा गोविन्द परियारले सञ्चालन तथा हुमबहादुर रानाले स्वागत मन्तव्य राख्नुभएको थियो।