काठमाडौं । अन्तर्राष्ट्रिय नेपाली एकता समाज को आयोजनामा यही जेठ १५ गते (तदानुसार में २९, २०२६) “संविधान संशोधनको सन्दर्भमा गणतन्त्र र राष्ट्रियता” विषयक भर्चुअल अन्तरक्रिया कार्यक्रम आयोजना हुने भएको छ । समसामयिक राजनीतिक परिस्थिति, संविधान संशोधनको बहस तथा राष्ट्रियताको प्रश्नलाई केन्द्रमा राखेर कार्यक्रम सञ्चालन गर्न लागिएको आयोजकले जनाएको छ ।

साँझ ६ बजे सुरु हुने उक्त कार्यक्रममा विभिन्न राजनीतिक तथा कानुनी क्षेत्रका वक्ताहरूले आ–आफ्‌नो धारणा राख्नुहुने छ । कार्यक्रममा राष्ट्रिय जनमोर्चाका महासचिव मनोज भट्ट, नेकपा (मसाल)का प्रवक्ता रामप्रकाश पुरी र अखिल नेपाल कानुन व्यवसायी संघ (अन्ला) का अध्यक्ष पदम रोकाले मन्तव्य राख्ने कार्यक्रम रहेको छ ।

त्यसैगरी, कार्यक्रममा प्रस्तुत गरिने अवधारणा पत्र समाजका अध्यक्ष शक्तमान बुढाथोकीले प्रस्तुत गर्नुहुने आयोजकले जानकारी दिएको छ । कार्यक्रममा संविधान संशोधनको आवश्यकता, गणतान्त्रिक व्यवस्था सुदृढीकरण, राष्ट्रिय स्वाधीनता तथा समसामयिक राजनीतिक चुनौतीबारे व्यापक छलफल हुने अपेक्षा गरिएको छ।

आयोजकका अनुसार कार्यक्रम भर्चुअल माध्यमबाट सञ्चालन हुने भएकाले देश तथा विदेशमा रहेका नेपाली समुदायको सहभागिता रहने विश्वास गरिएको छ । संविधान, लोकतन्त्र र राष्ट्रियताको विषयमा चासो राख्ने सबैलाई कार्यक्रममा सहभागी हुन आग्रह गरिएको छ ।