काठमाडौं । प्रदेश २ मा कोरोना संक्रमण तिब्र गतिमा फैलिएको छ । कोरोनाको संक्रमण समुदायस्तरमै फैलिएको विज्ञहरुले बताएका छन् ।
यसै क्रममा वीरगञ्ज महानगरपालिकाका मेयर विजय सरावगी र उच्च अदालत जनकपुरका एक न्यायाधीशलाई कोरोना संक्रमण भएको छ ।
न्यायाधीशलाई नै संक्रमण भएपछि जनकपुर उच्च अदालत र जिल्ला अदालत धनुषा भोलिदेखि बन्द हुने भएका छन् । दुवै अदालतका निश्चित कामकारबाही बाहेक अन्य सबै सेवाहरु शुक्रबार देखि बन्द हुने जनकपुर उच्च अदालतका एक कर्मचारीले बताए ।
लकडाउमा प्रदान गर्दै आएको निश्चित कामकारबाही बाहेक अन्य कामकारबाही शुक्रबारदेखि साउन मसान्तसम्मको लागि स्थगन गर्ने निष्कर्शसहित सर्वोच्च अदालतलाई अनुरोध गर्ने निर्णय गरको जनाइएको छ ।
साउन १३ गते उच्च अदालतका न्यायाधीशसहित २२ जना कर्मचारीहरुको स्वाब प्रादेशिक प्रयोगशाला जनकपुरमा परीक्षण गर्दा एकजना न्यायाधीशको रिपोर्ट पोजेटिभ आएको थियो ।
यता, वीरगञ्ज महानगरपालिकाका मेयर विजय सरावगीले आफूलाई कोरोन संक्रमण भएको बताउनुभएको छ । बिहीबार मेयर सरावगी फेसबुकमा स्ट्याटस लेख्दै आफूलाई कोरोना पोजेटिभ भएको जानकारी दिनुभएको हो ।
कोरोनाको कहरबाट महानगरबासीलाई बचाउन प्रयासरत रहँदारहँदै आफैँ संक्रमित भएको भन्दै मेयर सरावगीले कोरोना संक्रमणको लडाईं जितेर पुनः जनताको सेवामा आउने प्रतिवद्धता जाहेर गर्नुभएको छ ।
