नवीन बस्याल ##
‘रक्तिम सांस्कृतिक अभियान’ भन्नेबित्तिकै नेपाली जनताको चेतना, सङ्घर्ष र परिवर्तनको प्रतीकको रूपमा उभिएको एक सशक्त सांस्कृतिक आन्दोलनको झल्को आउँछ । गीत, सङ्गीत, नृत्य तथा अभिनयमार्फत समाजलाई जागरुक बनाउने यस अभियानले लामो समयदेखि जनताको पक्षमा आफ्नो सशक्त उपस्थिति जनाउँदै आएको छ । नेपाल कम्युनिस्ट पार्टी (मसाल) तथा राष्ट्रिय जनमोर्चासँग आबद्ध यस सांस्कृतिक मोर्चाले देशको राजनीतिक तथा सामाजिक रूपान्तरणमा महत्त्वपूर्ण भूमिका निर्वाह गर्दै आएको छ ।
नेपालका विभिन्न सङ्घर्षपूर्ण कालखण्डमा रक्तिम सांस्कृतिक अभियानले आफ्नो सृजनात्मक शक्तिमार्फत जनताको आवाजलाई बुलन्द बनाएको छ । जनआन्दोलन, राष्ट्रिय स्वाधीनता, अखण्डता तथा जनअधिकारको पक्षमा उठेका आन्दोलनमा यसले गीतसङ्गीतलाई हतियारका रूपमा प्रयोग गर्दै जनतालाई सचेत, एकजुट र सङ्घर्षशील बनाउने कार्य गरेको गौरवपूर्ण इतिहास यससँग जोडिएको छ ।
देशमा जब जब आन्तरिक अवसरवाद वा बाह्य हस्तक्षेपको चुनौती देखा पर्छ, तब तब यो अभियान अग्रपङ्क्तिमा उभिएर जनचेतना फैलाउने जिम्मेवारी वहन गर्दै आएको छ । नेपालको सिमाना अतिक्रमणका विषय, २०६२–६३ सालको ऐतिहासिक जनआन्दोलन, एमसिसी सम्झौता विरुद्धका आन्दोलन, सङ्घीयता खारेजीका अभियानलगायत विभिन्न राष्ट्रिय मुद्दामा यसको सांस्कृतिक हस्तक्षेप उल्लेखनीय रहँदै आएको छ ।
यसै सन्दर्भमा राष्ट्रघाती प्रवृत्ति विरुद्ध सशक्त सन्देश दिन तथा जनतालाई अझ सचेत बनाउने उद्देश्यले रक्तिम सांस्कृतिक अभियानले यही जेठ १६ गते बृहत् सांस्कृतिक कार्यक्रम आयोजना गर्न गइरहेको छ । उक्त कार्यक्रममा आम नेपाली जनताको उल्लेखनीय सहभागिता अत्यन्त आवश्यक रहेको छ ।
निर्वाचन सम्पन्न भई नयाँ सरकार गठन भएको वर्तमान परिवेशमा जनताको चेतनास्तर अभिवृद्धि गर्ने उद्देश्यले आयोजना गरिएको यस कार्यक्रममा सम्पूर्ण नेपाली आमाबुवा, दाजुभाइ तथा दिदीबहिनीलाई उपस्थितिका लागि हार्दिक आह्वान गर्दछौँ ।
अन्त्यमा रक्तिम सांस्कृतिक अभियान जापानको तर्फबाट तपाईंहरूले गर्दै गरेको कार्यक्रम भव्य, सभ्य र ऐतिहासिक रूपमा सफल होस् भन्ने हार्दिक शुभकामना व्यक्त गर्दछौँ ।
