दिल्ली । भारतस्थित नेपालीहरूको हकहितका लागि क्रियाशील संगठन मूल प्रवाह अखिल भारत नेपाली एकता समाज अन्तर्गत दिल्ली नगर समितिले आर्थिक अभावमा परेका एक नेपालीलाई सहयोग गरेको छ ।
नवलपरासी जिल्ला गैंडाकोट–२ निवासी बुवा नन्दलाल न्यौँपाने र आमा रूकमाया न्यौँपानेका ४७ वर्षीय छोरा जितबहादुर न्यौँपाने लामो समयदेखि भारतको दिल्लीस्थित रोहिणी सेक्टर–५ रिठालामा बसोबास गर्दै आएको थिए । आर्थिक अवस्था अत्यन्त कमजोर भएका कारण उनी घर फर्किनसमेत असमर्थ अवस्थामा रहेको जानकारीपछि मूल प्रवाह दिल्ली नगर समितिका कार्यकर्ताहरूले आर्थिक संकलन कार्यक्रम गरेका थिए ।
संकलित रकममध्ये रु. ४,५०० (चार हजार पाँचसय) नगद सहयोग हस्तान्तरण गरिएको समितिले जनाएको छ । साथै समितिका अध्यक्ष रामु धमालले आफ्नै ट्राभल एजेन्सीमार्फत बुटवलसम्मको बस यात्रा निःशुल्क व्यवस्था गरिएको बताइएको छ ।
विदेशमा समस्यामा परेका नेपालीहरूलाई सहयोग गर्दै आएको मूल प्रवाह दिल्ली नगर समितिको यस मानवीय कार्यको स्थानीय नेपाली समुदायले प्रशंसा गरेका छन् ।
