खिमराज चालिसे
केरला, भारत । भारतस्थित नेपालीहरूको हकहित र समस्यामा निरन्तर अभिभावकीय भूमिका निर्वाह गर्दै आएको मूल प्रवाह अखिल भारत नेपाली एकता समाजले पुनः मानवीय कार्यमा योगदान पुर्याएको छ । केरल राज्यको कोचिनमा मृत अवस्थामा फेलापरेका रामकृष्ण पुलामीको दाह–संस्कार गरेको छ ।
केरल प्रहरीले करिब लावारिस अवस्थामा फेलापारेका रामकृष्ण पुलामीका आफन्तहरूको खोजी गर्ने क्रममा उनी बाग्लुङ जिल्लाको अमलाचौर–७ निवासी रहेको खुलेको थियो । परिवारसँग सम्पर्क भएपछि आर्थिक तथा अन्य कारणले भारत आउन नसक्ने अवस्था रहेको जानकारी गराइएको थियो । त्यसपछि परिवार र स्थानीय प्रशासनको सहमतिमा आवश्यक कानुनी प्रक्रिया पूरा गरी मूल प्रवाहले अन्तिम संस्कार सम्पन्न गरेको छ ।
गत शुक्रबार, १५ मे २०२६ मा गरिएको दाह–संस्कारमा मूल प्रवाह अखिल भारत नेपाली एकता समाज दक्षिण भारत क्षेत्रीय सदस्य तथा कोचिन नगर अध्यक्ष बाबुराम केसी, सदस्य जनक बिसी, तेजबहादुर केसी, नरबहादुर खत्रीलगायतको सक्रिय सहभागिता रहेको जनाइएको छ ।
यसअघि पनि मूल प्रवाहले यस्ता कैयौँ मानवीय कार्य गर्दैआएको छ । केही दिन पहिला मात्रै काभ्रेपलाञ्चोक जिल्लाको बेथानचोक गाउँपालिका–६ निवासी घनश्याम पाख्रीनका छोरा सुरज पाख्रीनको अप्रिल १९, २०२६ मा कोचिनमै निधन भएपछि परिवार र स्थानीय पालिकाको आग्रहमा संस्थाले अप्रिल २९ मा उनको पनि दाह–संस्कार गरेको थियो ।
भारत प्रवासमा रहेका नेपालीहरूको दुःख–सुखमा साथ दिँदै आएको मूल प्रवाह अखिल भारत नेपाली एकता समाजको यस्तो कार्यले प्रवासी नेपाली समुदायमा सकारात्मक सन्देश प्रवाह गर्दैआएको छ ।
