काठमाडौं । काठमाडौंमा १५ किलो नक्कली सुन फालेर भाग्ने तीन जना नवलपरासीमा पक्राउ परेका छन् । तीनै जना पूर्वीनवलपरासीबाट पक्राउ परेका हुन् ।
केही दिन अघि काठमाडौंको कमलादीमा प्रहरीले पिछा गरेपछि बा ६च ५५१९ नम्बरको गाडीबाट सुन र पेस्तोल भएको झोला फालेर उनीहरु भागेका थिए । सो झोलामा भएको १५ किलो पहेँलो धातुमध्ये पाँच सय ग्राम सक्कली सुन र बाँकी सबै नक्कली भएको प्रहरीको दाबी छ । सुनसँगै दुई वटा पेस्तोल पनि प्रहरीले बरामद गरेको थियो ।
घटनामा प्रयोग भएको भनिएको बा. ६च ५५१९ नम्बरको स्कोर्पियो अझै फेला नपरेपछि प्रहरीमाथि आशंका सुरु भएको थियो । प्रहरीकै गतिविधि शंकास्पद पाइएपछि हिजै छानबिन समिति गठन गरिएको थियो ।
सो प्रकरण छानबिनका लागि प्रहरीले बनाएको छानबिन समितिका संयोजक पनि परिवर्तन भएका छन् । महानगरीय प्रहरी कार्यालय रानीपोखरीले एसएसपी दीपक थापाको स्थानमा एसएसपी सुशीलकुमार यादवलाई संयोजक बनाएको छ ।
रानीपोखरीका डीआईजी विश्वराज पोखरेलले घटनाको छानबिन सुरु भएको र दोषी पाइए कुनै पनि प्रहरीलाई उन्मुक्ति नदिइने बताउनुभयो ।
