काठमाडौं, १४ मे २०२६ । मूल प्रवाह अखिल भारत नेपाली एकता समाजले भारतका विभिन्न सहरहरूमा भएका लुटपाट, हत्या लगायतका आपराधिक घटनामा केही नेपाली समुदायका व्यक्तिहरूको संलग्नता देखिएको भन्दै गम्भीर चिन्ता व्यक्त गरेको छ । समाजका अध्यक्ष प्रेम पौडेलद्वारा जारी प्रेस वक्तव्यमा यस्ता घटनाले भारतमा बसोबास गर्ने मेहनती तथा श्रमजीवी नेपालीहरूको सम्मान र पहिचानमा नकारात्मक असर परेको उल्लेख गरिएको छ ।
वक्तव्यमा नेपाल र भारतबीच सन् १९५० मा सम्पन्न शान्ति तथा मैत्री सन्धिले दुई देशका नागरिकलाई आवतजावत, रोजगारी र व्यवसायमा सहजता दिएको स्मरण गराउँदै केही व्यक्तिले त्यसको दुरुपयोग गर्दै गैरकानुनी गतिविधिमा संलग्न भएको जनाइएको छ । नेपालमा अपराध गरेर भारतमा लुक्ने तथा भारतमा अपराध गरेर नेपालमा आश्रय लिने प्रवृत्तिले दुई देशबीचको पुरानो मित्रतामै असर पारिरहेको समाजको भनाइ छ ।
विशेषगरी हैदराबाद र बेंगलुरुमा भएका लुटपाट तथा हत्याका घटनामा नेपाली समुदायका केही व्यक्तिको संलग्नता पाइएको आधारमा सम्पूर्ण नेपाली समुदाय बदनाम गर्ने कार्य प्रशासनबाट भइरहेको वक्तव्यमा उल्लेख छ । यसका कारण भारतमा रहेका आम नेपालीमाथि शंका बढ्नुका साथै रोजगारीमा समेत असर परेको प्रति समाजले चिन्ता व्यक्त गरेको छ ।
समाजले मानवता, नैतिक मूल्य र सामाजिक जिम्मेवारी कमजोर बन्दै गएकोप्रति चिन्ता व्यक्त गर्दै चोरी, डकैती, हत्या जस्ता गतिविधिको कडा शब्दमा भत्र्सना गरेको छ । कुनै पनि अपराधीको जात, समुदाय वा राष्ट्रियता नहुने भन्दै दोषीमाथि कडा कानुनी कारबाही गर्न समाजले प्रशासनसँग माग गरेको छ ।
त्यसैगरी, समाजले भारत सरकार तथा प्रशासनलाई सन् १९५० को नेपाल–भारत शान्ति तथा मैत्री सन्धिअनुसार नेपाली नागरिकले पाउँदै आएको आवागमन, रोजगारी र सम्पत्ति आर्जनको अधिकारमा अवरोध नगर्न आग्रह गरेको छ ।
साथै सम्पूर्ण नेपाली समुदायलाई कुनै पनि असामाजिक तथा गैरकानुनी गतिविधिमा संलग्न नहुन र यस्ता गतिविधिबारे जानकारी भए प्रशासनलाई सूचित गर्न समेत मूल प्रवाहले अपिल गरेको छ ।
