काठमाडौँ । आगामी जेठ १६ गते काठमाडौँको जमलस्थित राष्ट्रिय नाचघरमा आयोजना हुन थालेको ‘रक्तिम विशेष साँझ’ को तयारी तीव्र गतिमा अघि बढेको छ ।
रक्तिम सांस्कृतिक अभियान केन्द्रीय समितिको आयोजना सम्पन्न हुने काठमाडौँको कार्यक्रमका लागि यतिखेर तयारी तीव्र बुझिएको हो ।
यसै सन्दर्भमा कार्यक्रमको तयारी, प्रचारप्रसार, टिकट विक्रीलगायतका विषयमा छलफल गर्न २०८३ वैशाख २६ गते बागबजारमा बैठक बसेको जनजाति नेता निमबहादुर बुढाथोकीले जानकारी दिनुभयो ।
राष्ट्रिय जनमोर्चाका नेता आनन्द शर्माको अध्यक्षतामा बसेको सो बैठकले बुढाथोकी संयोजक रहनुभएको कार्यक्रम परिचालन समिति गठन गरेको बताइएको छ । सो समितिका सदस्यमा दिवाकर सुवेदी, छवि खनाल, लालबहादुर थापा, जगत्प्रसाद रेग्मी, समीर सिंह, हेमराज आश्रम, गिरीप्रसाद बुढा र रमेश पौडेल रहनुभएको छ ।
त्यस्तै टिकट विक्री वितरणका लागि हेमराज आश्रम, दुर्गा पौडेल, मीना पुन, ऋतु केसी, अधिवक्ता पदम रोका, सुवास जिसी, हीरा केसी, झविन्द्र बेलबासे, भक्त विश्वकर्मा, मनोज भट्ट र लालबहादुर थापासमेतको समिति बनेको बुढाथोकीले जानकारी दिनुभयो ।
एवम् प्रकारले हेमराज आश्रम संयोजक रहनुभएको गोविन्द शर्मा, धनवीर पुन र सगर सुवेदीसमेतको प्रचारप्रसार समिति पनि गठन भएको बताइएको छ ।
विशेष साँझ काठमाडौँबाहिर पनि
अध्यक्ष गिरीप्रसाद बुढाका अनुसार रक्तिमको उक्त विशेष सांस्कृतिक कार्यक्रम उपत्यकाबाहिर पनि आयोजना गरिएको छ । उहाँका अनुसार चितवनमा जेठ १७ गते, बागलुङमा जेठ २३ गते, पोखरामा जेठ २४ गते, बुटवलमा जेठ ३० गते, गुल्मीमा जेठ ३१ गते, अर्घाखाँचीमा असार ६ गते, प्युठानमा असार ७ गते र रोल्पामा असार १३ गते सो कार्यक्रम सम्पन्न हुनेछन् ।
