बेलबारी (मोरङ) । बेलबारी मोरङकी साहित्यकार रेखा सुवेदी नगद रु. ५० हजार पाँचसहित स्वर्णिम साहित्य पुरस्कार–२०८३ बाट पुरस्कृत भएकी छिन् । त्यसैगरी धरान निवासी अग्रज साहित्यकार सरणकुमार राई रु. १० हजार पाँचसहित स्वर्णिम साहित्य सम्मानबाट सम्मानित भएका छन् ।
२०८३ वैशाख २६ गते सो कार्यक्रम साहित्य भूमि, बराहक्षेत्र–३ नडाहाको टेकाने रोस्ट सेन्टर एन्ड सेकुवा कर्नरको सभाकक्षमा स्वर्णिम साहित्य समाजको आयोजनामा सम्पन्न भएको थियो ।
दुवै साहित्यकारलाई प्रमुख अतिथि वरिष्ठ साहित्यकार श्रवण मुकारुङ, कार्यक्रम अध्यक्ष प्रकाश दिप्साली राई र आयोजक अध्यक्ष सरणकुमार लिम्बूले अबिर, खादा, दुबोको माला, सम्मानपत्र र नगद प्रदान गरेका थिए ।
प्रमुख अतिथि मुकारुङले सिर्जनाले मानिसहरूको आत्मा छुनुपर्ने बताए । ‘पहिला पहिला मैले पनि क्रान्तिका लागि लेखेँ हुँला, रहर मेटाउन लेखेँ हुँला तर अहिले समाजमा मानिसलाई सकारात्मक बनाउन लेख्दै गरेको छु’ उनले भने ।
सम्मानित राईले म मरेपछि मलाई करौडौँ रुपियाँसहित सम्मान गर्नुभएको हुन्थ्यो भने पनि त्यो सम्मान मलाई काम लाग्ने थिएन तर आफू जिउँदै हुँदा सम्मान गर्नुभएकोमा धन्यवाद भनेर खुसी प्रकट गरे ।
पुरस्कृत सुवेदीले आफ्नी आमालाई सम्झिँदै उनलाई यो तहसम्म आउँदा सहयोग गर्नेहरूलाई धन्यवाद दिँदै उनको कविताकृति ‘नयाँ अनुहारको हराएको यलम्बर खोजिरहेकी छु’ शीर्षकको कविता वाचन गरेकी थिइन् ।
कार्यक्रममा लोकगायक तेजिन्द्र गन्धर्वले ‘राईमाहिलाले गाउँ छोड्यो रे’ लगायतका तीनओटा गीत सारङ्गीको रेटाइसँगै गाएका थिए ।
साहित्यकारहरू प्रल्हाद पहरेदार, ईरानराई, हेनसेम याखा, जेबी थुलुङ, भीम विरही राई, राजेन्द्र कार्की, विश्वजित चाम्लिङ राई, हेमन यात्री, रमेश निरौला, तिला लेकाली, दीप मङ्ग्राती, धनजित पराजुली, आशाराम चौधरी, रोहित काफ्ले, बादल चाम्लिङ, उमा सिजापती, निरू गौतम, यज्ञराज सुवेदी सुसेली, दीपा मङ्ग्राती, उर्मिला शर्मा रिजाल, राजन बान्तावा, नदी राई अतिथिको उपस्थिति रहेको थियो ।
स्वर्णिम साहित्य सम्मान तथा पुरस्कार कोषका अध्यक्ष प्रकाश दिप्साली राईको अध्यक्षता र सचिव सविता फागो चोङबाङको सञ्चालनमा सो कार्यक्रम सम्पन्न भएको थियो ।
