मोहनविक्रम सिंह ##
व्यवहारले भूतपूर्व प्रधानमन्त्री केपी शर्मा ओली र वर्तमान प्रधानमन्त्री बालेन शाहको चरित्र र कार्यशैली एकै प्रकारको भएको कुरा प्रष्ट भएको छ ।
सामाजिक सञ्जाललाई नियमन गर्नु आवश्यक र सही दुवै थियो । सर्वोच्च अदालतले त्यसबारे कानुन बनाएर नियमन गर्न भनेको थियो तर ओलीले त्यसो नगरीकन ठाडो प्रकारले सामाजिक सञ्जालमाथि प्रतिबन्ध लगाएका थिए । उनको त्यस प्रकारको व्यवहार उनको अधिनायकवादी चरित्र र स्वेच्छाचारी कार्यशैलीको परिणाम थियो । बालेनले सुकुम्बासीप्रति अपनाएको नीतिबाट पनि उनको ओलीको जस्तो अधिनायकवादी चरित्र र कार्यशैली प्रकट भएको छ ।
सर्वोच्च अदालतको फैसला समेतबाट नदीका तिरमा बसेका सुकुम्बासीलाई त्यहाँबाट हटाउनु आवश्यक थियो । त्यसका साथै गैरसुकुम्बासीले आफूलाई सुकुम्बासी बताएर जमिनमाथि कब्जा गर्ने जुन काम गरेका थिए, उनीहरूलाई पनि त्यहाँबाट हटाउनु आवश्यक थियो तर ती सबै कार्यहरू कानुनी र न्यायपूर्ण तरिकाले गरिनुपर्दथ्यो । त्यसका विपरीत बालेनले पनि ओलीले जस्तै ठाडो र जबर्जस्ती सुकुम्बासीलाई आफ्नो घरजग्गाबाट हटाउने काम गरे । उनीहरूलाई एक दिनपहिले मात्र माइकद्वारा सूचना दिएर अर्को दिन उनीहरूका घर डोजर लगाएर भत्काउने काम गरियो । त्यो अत्यन्त अमानवीय र बर्बर कारबाही थियो । त्यसरी मूलभूत रूपमा ओली र बालेन दुवैको चरित्र अधिनायकवादी र स्वेच्छाचारी भएको कुरामा कुनै शङ्का रहन्न ।
ओलीको अधिनायकवादी चरित्रको जबाफ जेनजी युवाहरूले दिएका थिए तर बालेनको त्यस प्रकारको अधिनायकवादी र स्वेच्छाचारी कार्यशैलीको जबाफ कहिले र कसरी आउनेछ ? त्यो कुरा आउने दिनमा नै थाहा हुँदै जानेछ ।
यस सन्दर्भमा ओली र बालेन शाहबारे व्याख्या र विश्लेषण गर्ने कुराहरू धेरै छन् तर अहिले हामी ती सबैको चर्चा गर्नपट्टि लाग्दैनौँ । समय बित्नुका साथै ती सबै कुरा अगाडि आउदै जानेछन् ।
