काठमाडौं । काठमाडौंको नक्सालस्थित नेपाल प्रहरीको हेडक्वाटरमा कार्यरत २७ जना प्रहरीमा कोरोना संक्रमण पुष्टि भएको छ ।
प्रहरी प्रवक्ता एआईजी निरज शाहीका अनुसार पहिलो दिन ४ जनामा संक्रमण देखिएको थियो भने त्यसपछि एकैदिन हिजो २३ जनामा संक्रमण देखिएको हो ।
स्वास्थ्य मन्त्रालय र प्रहरी अस्पतालको संयुक्त टोलीले जाँच र संक्रमितको सम्पर्कमा आएकोको ट्रेसिङ प्रक्रिया अगाडि बढाएको प्रवक्ता शाहीले बताउनुभयो ।
हेडक्वाटरमा संक्रमण देखिएपछि प्रहरीले सर्वसाधारणलाई प्रवेश निषेध गरेको छ । तर अत्यन्त जरुरी काम परेकालाई भने प्रवेश दिइने प्रवक्ता शाहीले बताउनुभयो ।
यसरी कोभिड देखिएकामध्ये धेरै सवारी शाखा र सञ्चार शाखाका रहेका छन्। यी दुई शाखालाई सिल गरिएको छ। उनीहरूलाई कोभिड संक्रमण कसरी भयो भन्ने खुलेको छैन ।
त्यस्तै सोमवारमात्र स्याङ्जा जिल्लाका प्रहरी प्रमुख एसपीसहित १८ जना प्रहरीमा कोभिड देखिएको थियो । १ नम्बर प्रदेश प्रहरी कार्यालयमा कार्यरत १९ जनामा आइतबार कोभिड पोजेटिभ पुष्टि भएको थियो ।
अहिलेसम्म १ सय ८४ जना प्रहरीमा कोभिड १९ सङ्क्रमण देखिसकेको छ । जसमध्ये ९९ जना उपचारपछि काममा फर्किसकेका छन् ।
