काठमाडौं । सोमबार रातिदेखि निरन्तर भइरहेको वर्षासँगै आएको बाढी पहिरोबाट फेरि देशका विभिन्न भागमा जनधनको क्षति भएको छ । बागलुङमा मात्रै बाढी र पहिरोमा परी चार जनाको मृत्यु भएको छ ।
पहिरोले घर पुरिँदा तमानखोला गाउँपालिका–२ मा पालबहादुर विकका १३ वर्षीया छोरा खिमबहादुर विक र १२ वर्षीया छोरी रीता विकको मृत्यु भएको छ ।
घरमा सुतिरहेको अवस्थामा घरमाथिबाट आएको पहिरोले उनीहरुलाई पुरेको प्रहरीले जनाएको छ । सँगै सुतिरहेकी मृतककी आमा होमकुमारी विक गम्भीर घाइते भएकी छन् । उनलाई उपचारका लागि अस्पताल पठाउने तयारी भइहेको छ ।
पालबहादुर रोजगारीको सिलसिलामा विदेशमा छन् । घर क्षतविक्षत अवस्थामा रहेको प्रहरी नायब उपरीक्षक राजेन्द्र रेग्मीले जानकारी दिनुभयो ।
त्यस्तै निसीखोला गाउँपालिका–१ मा एक घर पहिरोले पुरेको छ । पहिरोमा परी अन्दाजी पाँच वर्षीय समिर परियारको मृत्यु भएको प्रनाउ रेग्मीले बताउनुभयो । निसीखोला गाउँपालिकामानै अन्दाजी ६० वर्षीया एक महिलाको शव खोलाको छेउमा फेलापरेको छ । उहाँको पहिचान नखुलेको जनाइएको छ ।
पहिरोले घर पुर्दा आमाबुवा बेपत्ता, छोराले भागेर ज्यान जोगाए
यता, दार्चुलाको दुहुँ गाउँपालिका–३ सल्लीखेतमा पहिराले घर पुर्दा दुई जना बेपत्ता भएका छन् । मंगलबार बिहान घरमाथिबाट खसेको पहिरोमा पुरिएर दुई जना बेपत्ता भएका प्रहरीले जनाएको छ ।
पहिरो आउँदा घर भित्र रहेका ५० वर्षीय रामदत्त जोशी र उनकी श्रीमती ४५ वर्षीया इन्द्रा जोशी घर भित्रै पुरिएका हुन् । घरमा चार जनाको बसोबास थियो । घरमै रहेका २१ वर्षीय सुनिल जोशी भने भाग्न सफल भएका छन । छोरी भने आफन्तको घरमा सुत्नु गएका कारण बचेकी छन् ।
घरमाथिबाट गएको सडक भासिएर पहिरो गएको हो । जिल्ला प्रहरी कार्यालय दार्चुलाबाट प्रहरी निरीक्षक भाष्कर चन्द नेतृत्वको टोली उद्धारका लागि घटनास्थलतर्फ हिँडेको छ ।
