काठमाडौँ । सरकारको कार्यशैलीप्रति आपत्ति जनाउँदै मुलुक फेरि तानाशाहीतर्फ अगाडि बढिरहेको महन्थ ठाकुरले आशंका व्यक्त गरेका छन् । उनी जनता समाजवादी पार्टी (जसपा) नेपालका संरक्षक तथा राष्ट्रिय सभाका सदस्य हुन् ।
सरकारका कामकाजप्रति आपत्ति जनाउँदै सोमबार राष्ट्रिय सभाअन्तर्गतको विकास, आर्थिक मामिला तथा सुशासन समितिको बैठकमा ठाकुरले सो धारणा राखेका हुन् ।
ट्रेड युनियन, विद्यार्थी संगठनमाथि प्रतिबन्ध गरिएकोमा ठाकुरले आपत्ति जनाए । उनले जनताको अधिकार खोसिँदा राष्ट्र नै कमजोर हुने बताए । ‘ट्रेड युनियन, स्कुल–कलेजहरू र अदालतको कम्पाउन्डलाई प्रजातन्त्र आउनुभन्दा पहिले पनि केही मात्रामा स्वतन्त्रताको अनुभूति हुने थलोका रूपमा चिनिन्थ्यो’ ठाकुरले थपे ।
‘निजी क्षेत्रका व्यवसायीको घरमा आगो लगाउने, लुट्ने र विना स्पष्ट कारण गिरफ्तार गर्ने कार्य भइरहेको छ’, उनले थपे, ‘यो सरकारले आफूलाई जेनजी सरकार भन्छ, वास्तवमा जेनजी के हो? के हाम्रो जेनेरेसन खत्तम हो र अहिलेको मात्र सही हो ?’
