काठमाडौँ । सरकारले शनिबार बिहानदेखि काठमाडौँका थापाथली, गैरीगाउँ र मनोहरा खोलाकिनारका सुकुम्बासी बस्ती हटाउन माइकिङ गरिरहेकै बेला अखिल नेपाल किसान महासङ्घ (अप्फा) का अध्यक्ष भैरवराज रेग्मीले व्यवस्थापनलाई प्राथमिकता दिन सरकारसित माग गर्नुभएको छ ।
युगदर्शन मिडियाले शुक्रबार उहाँसँग प्रतिक्रिया माग्दा उहाँले भन्नुभयो– ‘पहिला को वास्तविक सुकुम्बासी हो भन्ने छानबिन गरियोस् । त्यसपछि वास्तविक सुकुम्बासीलाई व्यवस्थापन गरियोस् । बल्ल सुकुम्बासी बस्ती हटाइयोस् ।’
अध्यक्ष रेग्मीले प्रधानमन्त्री बालेन्द्र शाह काठमाडौँ महानगरपालिकाको मेयर रहँदै गर्दा यो माग उठाइएकोमा उनले त्यसलाई बेवास्ता गरिएको आरोप लगाउनुभयो ।
‘बालेनजी मेयर रहेकै बेला हामीले काठमाडौँका सुकुम्बासीको छानबिन गरी लगत निकाल्न अनुरोध गरेका थियौँ’ उहाँले भन्नुभयो– ‘तर उहाँले त्यसप्रति बेवास्ता गर्नुभयो । उहाँले छानबिन गरी वास्तविक लगत निकाल्नुभन्दा पनि डोजर आतङ्कतफै नै रुचि देखाउनुभयो ।’
वास्तविक सुकुम्बासी
रेग्मीले थापाथलीलगायत काठमाडौँका विभिन्न स्थानमा खालि नक्कली सुकुम्बासी छन् भन्ने तथ्य सत्य नभएको बताउनुभयो ।
‘हाम्रो सङ्गठन र विभिन्न सरकारी निकायले पनि काठमाडौँका सुकुम्बासीबारे अध्ययन गरेको थियो’ उहाँले भन्नुभयो– ‘काठमाडौँमा न्यूनतम पाँच प्रतिशतभन्दा बढी वास्तविक सुकुम्बासी छन् ।’
उहाँले सुकुम्बासी र गैरसुकुम्बासीलाई एउटै डालोमा राखेर सुकुम्बासी बस्तीमा डोजर चलाउनु सरकारको गलत तरिका भएको टिप्पणी गर्नुभयो ।
सरकारले यतिखेर काठमाडौँमा मात्रै नभएर नेपालभरि नै डोजर आतङ्क चलाइएको आरोप लगाउनुभयो ।
इचङ्गुनारायणको भवन अपर्याप्त
सरकारले काठमाडौँको इचङ्गुनारायणमा डा. बाबुराम भट्टराई प्रधानमन्त्री हुँदा बनाइएको भवन अपर्याप्त भएको बताउनुभयो ।
अहिले हटाउन थालिएका सुकुम्बासीहरू इचङ्गुनारायण भवनमा जाँदा के हुन्छ भन्ने युगदर्शनको प्रश्नमा उहाँले भन्नुभयो– ‘त्यहाँ बनाइएको भवन सुकुम्बासी परिवारका लागि अपर्याप्त छ ।’
उहाँले अगाडि भन्नुभयो– ‘सुकुम्बासी परिवार कम्तीमा पाँच/सात जनाका छन् तर त्यहाँ बनाइएको भवनमा दुई जनाभन्दा बढी अट्दैनन् ।’
अध्यक्ष रेग्मीले इचङ्गुनारायण भवन दुर्गम स्थानमा पनि रहेकाले रोजगारीको समस्या पर्ने दाबी गर्नुभयो ।
संयुक्त किसान सङ्गठनको विरोध
रेग्मीले विनाछानबिन सुकुम्बासी बस्तीमा डोजर आतङ्क चलाउन थालेकोमा किसान सङ्गठनले विरोध गरिरहेको जानकारी दिनुभयो ।
‘हाम्रो सङ्गठनसहित चार किसान सङ्गठन सरकारको डोजर आतङ्कको विरोधमा छ’ उहाँले यसको विरोधमा आजै विरोधस्वरूप आफ्ना धारणा सार्वजनिक गर्न थालेको बताउनुभयो ।
उहाँले सरकारसित ऐनकानुनअनुसार नै सुकुम्बासी समस्यालाई समाधान गर्न सरकारसित अपिल गर्नुभयो ।
