काठमाडौँ । राजधानीमा साँस्कृतिक चेतनालाई नयाँ उचाइमा पुर्याउने उद्देश्यसहित “विशेष रक्तिम साँझ–२०८३” आयोजना हुने भएको छ । यसका लागि रक्तिम साँस्कृतिक अभियानले एउटा व्यानर सार्वजनिक गरेको छ ।
रक्तिम साँस्कृतिक अभियानको आयोजनामा हुन लागेको यो विशेष कार्यक्रमले कला, साहित्य र राष्ट्रिय पहिचानलाई एउटै मञ्चमा जोड्ने अपेक्षा गरिएको छ ।
कार्यक्रम आगामी जेठ १६ गते, २०८३ मा जमलस्थित राष्ट्रिय नाचघरमा दिउँसो १ बजेदेखि सुरु हुने रक्तिमका महासचिव हेमराज आश्रमले युगदर्शनलाई जानकारी दिनुभएको छ । आश्रमका अनुसार “राष्ट्रियताको रक्षा, रक्तिमको सदिच्छा” भन्ने मूल नारासहित कार्यक्रमले परम्परा र आधुनिक सृजनाबीचको सेतु निर्माण गर्नेछ ।
यस कार्यक्रममा सांगीतिक प्रस्तुति, नृत्य, नाटक तथा साँस्कृतिक झाँकीहरू प्रस्तुत गरिनेछन् । विशेषगरी युवा सर्जकहरूलाई आफ्नो प्रतिभा देखाउने अवसर प्रदान गर्दै नेपाली मौलिकताको संरक्षणमा जोड दिइने महासचिव आश्रमले बताउनु भयो ।
उहाँले आयोजक समितिले यो कार्यक्रम केवल मनोरञ्जन मात्र नभई साँस्कृतिक जागरणको अभियान भएको बताउनु भयो । “रक्तिम केवल कला होइन, यो हाम्रो पहिचान र भावनाको प्रतिबिम्ब हो,” आश्रमको भनाइ छ ।
काठमाडौँमा आयोजना हुन लागेको यस साँस्कृतिक साँझले प्रगतिशिल दर्शकहरूमा भावनात्मक, बौद्धिक र सौन्दर्यात्मक अनुभव दिने विश्वास लिइएको छ । कला प्रेमीहरूका लागि यो कार्यक्रम एक अविस्मरणीय अवसर हो भने वामपन्थी आन्दोलनको लागि महत्वपूर्ण टेवा पुर्याउने आशा गरिएको छ ।
कार्यक्रममा देशभरीबाट रक्तिमका कलाकारहरू जुट्ने महासचिव आश्रमले बताउनु भयो । आश्रमका अनुसार कार्यक्रममा कैयौँ पुराना कलाकारहरूको रहभागिता रहने छ ।
उहाँका अनुसा।र काठमाडौँमा कार्यक्रम प्रस्तुत गरेपश्छात देशका विभिन्न जिल्लाहरूमा पनि विस्तारपुर्वक साँस्कृतिक कार्यक्रम प्रस्तुत गरिनेछ ।
