काठमाडौँ । पाँच महिला सङ्गठन सम्मिलित संयुक्त महिला सङ्घर्ष समितिले साइबर सुरक्षासम्बन्धी अन्तरक्रिया कार्यक्रम सम्पन्न गरेको छ ।
२०८३ वैशाख ३ गते बिहीबार अनामनगरमा सो कार्यक्रम सम्पन्न भएको हो ।
टुका हमालको अध्यक्षता तथा दामा शर्माको सञ्चालनमा अघि बढेको उक्त कार्यक्रममा उपस्थित सहभागीलाई मीना पुनले स्वागत गर्नुभएको थियो ।
कार्यक्रममा नेपाल प्रहरीका निरीक्षक दीपा भट्टराईले साइबर अपराध, महिला तथा बालबालिकाको सुरक्षालगायतका विषयमा प्रशिक्षण दिनुभएको थियो ।
अधिवक्ता अन्जिता खनालले पनि महिलाले साइबर सुरक्षा र त्यसबारे अपनाउनुपर्ने सचेतनामाथि केन्द्रित रहेर प्रशिक्षण दिनुभएको थियो ।
एवम् प्रकारले डा. दोभान राईले पनि साइबर सुरक्षाले महिलालाई पार्ने असर र त्यसको कानुनी पाटोबारे प्रकाश पार्नुभएको थियो ।
सङ्घर्ष समितिमा राजमोनिकट अखिल नेपाल महिला सङ्घ, एमालेनिकट अखिल नेपाल महिला सङ्घ, तत्कालीन माओवादी केन्द्रनिकट अखिल नेपाल महिला सङ्घ (क्रान्तिकारी), माओवादीनिकट अखिल नेपाल महिला सङ्घ क्रान्तिकारी र तत्कालीन एकीकृत समाजवादीनिकट अखिल नेपाल महिला सङ्घ (समाजवादी) सम्मिलित छन् ।
