काठमाडौँ । अखिल नेपाल जनजाति सम्मेलनको चालिसौँ स्थापना दिवस मनाइएको छ ।
सम्मेलनको बागमती प्रदेश समितिको आयोजनामा २०८३ वैशाख ३ गते बिहीबार राष्ट्रिय जनमोर्चाको केन्द्रीय कार्यालयको सभाकक्षमा सो कार्यक्रम सम्पन्न भएको हो ।
केन्द्रीय अध्यक्ष निमबहादुर बुढाथोकीको अध्यक्षतामा सुरु भएको उक्त कार्यक्रममा उहाँले विषयवस्तु प्रस्तुत गर्नुभएको थियो ।
सो क्रममा २०४४ सालमा नेकपा (मसाल) ले आदिवासी जनजाति र दलित जातिको एउटै सङ्गठन बनाएको स्मरण गर्नुभयो ।
‘२०४४ सालमा अखिल नेपाल जनजाति दलित सङ्घ स्थापना भएको एक वर्षभित्रै जनजाति र दलित जातिका बेग्लाबेग्लै केन्द्रीय न्युक्लस गठन भए’ उहाँले भन्नुभयो– ‘संयुक्त सङ्गठन बनाए पनि जनजाति र दलितका बेग्लाबेग्लै समस्या रहेको व्यावहारिक रूपमा महसुस भएपछि त्यस्तो गरिएको थियो ।’
राजमो केन्द्रीय सल्लाहकार तथा वामपन्थी नेता आनन्द शर्माले जनजाति सम्मेलनले जातिवादका विरुद्ध सङ्घर्ष गर्दै आएकोमा हर्ष व्यक्त गर्नुभयो ।
गत सालको जेनजी आन्दोलन र फागुन २१ गतेको चुनावपछि देश गम्भीर अवस्थामा पुगेको बताउँदै उहाँले त्यसको प्रमाणको रूपमा जनवर्गीय सङ्गठन तथा ट्रेड युनियनमाथिको प्रतिबन्धको उदाहरण दिनुभयो ।
त्यस्तै अर्थमन्त्रीको नवउदारवादी सिद्धान्तअनुसार बजेट ल्याउने अभिव्यक्तिको आलोचना गर्दै उहाँले नेपालको संविधान–२०७२ ले मिश्रित अर्थनीति स्वीकार गरेको स्मरण गर्न सरकारलाई आग्रह गर्नुभयो ।
जनताको आन्दोलनले नै सरकारका गलत नीतिलाई नियन्त्रण गर्ने उहाँको भनाइ थियो ।
‘जनता सचेत हुनुपर्दछ, जनताको आन्दोलनले नै सरकारका गलत नीतिलाई सच्याउन सक्दछ’ शर्माको भनाइ थियो ।
कार्यक्रममा मन्तव्य राख्दै अर्का वक्ता मसालका ३ नम्बर ब्युरो प्रवक्ता समीर सिंहले जनजाति आन्दोलनले नेपालको सामाजिक तथा राजनीतिक परिवर्तनमा भूमिका खेलेको धारणा राख्नुनभयो ।
उहाँले भन्नुभयो– ‘आदिवासी जननजातिको पहिचान मात्रै ठुलो कुरो होइन, सामाजिक र राजनीतिक परिवर्तन ठुलो कुरा हो । नेपालमा आदिवासी जनजाति त्यस दिशामा क्रियाशील हुुनपर्दछ ।’
उहाँले जनजाति र दलित जाति मिलेर क्रान्तिक्रारी कम्युनिस्ट आन्दोलनमा योगदान दिनुपर्ने बताउनुभयो ।
त्यस क्रममा जनजाति आन्दोलनमा डलरको प्रभाव कमजोर बनाउनुपर्ने आवश्यकतामा उहाँले जोड दिनुभयो ।
प्रकाश थापामगरको सञ्चालनमा अघि बढेको सो कार्यक्रममा राजमो महासचिव मनोज भट्ट, जनजाति सम्मेलनका सचिवालय सदस्य धनवीर पुन, अखिल नेपाल किसान महासङ्घ (अप्फा) का केन्द्रीय कोषाध्यक्ष केबी घले, राजमो केन्द्रीय सदस्य सुधा शर्मा, अखिल नेपाल युवक सङ्घका केन्द्रीय सदस्य सगर सुवेदी र युगदर्शन मिडियाका व्यवस्थापक हरिकान्त शर्माको आतिथ्य रहेको थियो ।
त्यसैगरी अखिल नेपाल प्रगतिशील लेखक सङ्घ (अन्पा) केन्द्रीय समितिका प्रदीप प्रधान, मसालका काठमाडौँ प्रवक्ता जगत्प्रसाद रेग्मी, राजमो काठमाडौँका नेता छविलाल गैरे र अखिल नेपाल टे«ड युनियन महासङ्घ (अन्टुक) काठमाडौँका मदन पाण्डेको पनि आतिथ्य रहेको थियो ।
