तौलिहवा । राष्ट्रिय जनमोर्चा कपिलवस्तुले जिल्लाको तीनैओटा क्षेत्रमा फागुन २१ गतेको चुनावी समीक्षा कार्यक्रम सम्पन्न गरेको छ ।
२०८२ चैत ३० गते सोमबार क्षेत्र नं. १ र २ को गोरुसिङ्गमा र क्षेत्र नं. ३ को चन्द्रौटामा उक्त कार्यक्रम सम्पन्न भएको हो ।
गोरुसिङ्गेमा आयोजित कार्यक्रम राजमो जिल्ला अध्यक्ष रामप्रसाद बेल्बासेको अध्यक्षतामा अगाडि बढेको थियो ।
राजमो क्षेत्र नं. १ का उम्मेदवार माधव भाटक्षेत्री, क्षेत्र नं. २ की उम्मेदवार लक्ष्मी पोख्रेल र अखिल नेपाल किसान महासङ्घ (अप्फा) का उपाध्यक्ष शिव पौडेलले उक्त कार्यक्रममा मतपरिणामको बारेमा मन्तव्य राख्दै राष्ट्रिय स्वतन्त्र पार्टीले जनतालाई विभिन्न भ्रममा पारेको, युवा वर्गलाई सामाजिक सञ्जालमार्फत दिग्भ्रमित पारेको बताउनुभयो ।
उहाँहरूको भनाइ थियो– ‘चुनावी मतपरिणाम राजमोको पक्षमा नआए पनि हतास हुनुहुँदैन ।’
त्यसैगरी कपिलवस्तु क्षेत्र नं. ३ को चुनावी समीक्षा कार्यक्रम चन्द्रौटामा सम्पन्न भएको छ ।
राजमो कपिलवस्तुका कोषाध्यक्ष केहरसिंह पुनमगरको अध्यक्षता अघि बढेको उक्त कार्यक्रममा मन्तव्य राख्दै क्षेत्र नं. ३ का उम्मेदवार केरसिंह अदैले प्रतिनिधिसभा सदस्य निर्वाचनको क्रममा क्षेत्रका सबै ठाउँमा प्रचार प्रसार पुगेका, ३३ ओटै वडामध्ये ३२ ओटा वडामा गिलास चिह्नमा मत आएको बताउनुभयो।
भोट कम आउनुको कारण व्यापक सङ्गठन नहुनु, भएका सङ्गठनका कार्यकर्तामध्ये कतिपय ढुलमुल हुनु, कतिपय छोराछोरीमार्फत घण्टीमा भोट हालिनु, प्रचारमा ढिलासुस्ती हुनु आदि आदि कारण भएको उहाँको दाबी थियो ।
अखिल नेपाल बुद्धिजीवी सङ्घका जिल्ला सदस्य छन्दबहादुर केसीले चुनावमा मतपरिणाम कम आए पनि राजमो व्यापक रूपमा जनताका बीचमा पुगेको बताउँदै अहिलेको चुनावमा कङ्ग्रेस, एमाले, एमाओवादीको गलत नीति, भ्रष्टाचारका कारण विकल्पको रूपमा रास्वपालाई जनताले चुनेको तर त्यसको परिणामस्वरूप देशको राष्ट्रियता र गणतन्त्र झन् खतरामा पर्ने बताउनुभयो ।
कार्यक्रममा जातीय समता समाजका जिल्ला अध्यक्ष रामबहादुर विकले पनि मन्तव्य राख्नुभएको थियो ।
तत्कालीन राजमो प्रचारप्रसार समितिका संयोजकसमेत रहनुभएका पुनमगरले चुनावी गतिविधि, आर्थिक सहयोग, खर्च विवरणबारेमा प्रकाश पार्नुभएको थियो ।
कार्यक्रमको सञ्चालन बेगम बुढामगरले गर्नुभएको थियो ।
