काठमाडौँ । प्रतिनिधिसभाको उपसभामुखमा दुईजनाको उम्मेदवारी परेको छ । उम्मेदवारी दिनेमा सरस्वती लामा र रुवीकुमारी ठाकुरको उम्मेदवारी परेको हो । लामा राष्ट्रिय प्रजातन्त्र पार्टी (राप्रपा) की सांसद हुन् भने ठाकुर श्रम संस्कृति पार्टीकी सांसद हुन् ।
उपसभामुखको उम्मेदवारी दर्ता गर्नका लागि तोकेको बिहीबार बिहान ११ बजेदेखि दिउँसो २ बजेसम्मको समयमा लामा र ठाकुरको उम्मेदवारी मनोनयन दर्ता भएको संघीय संसद् सचिवालयका प्रवक्ता सहसचिव एकराम गिरीले जानकारी दिएका छन् ।
रुवी कुमारीको प्रस्तावकमा श्रम संस्कृति पार्टीका सांसद आर्यन राई र समर्थकमा राष्ट्रिय स्वतन्त्र पार्टी (रास्वपा) का सांसद अशोककुमार चौधरी र श्रम संस्कृतिकी सांसद अम्बिकादेवी निरौला रहेका छन् ।
त्यस्तै, लामाको राप्रपा संसदीय दलका नेता ज्ञानबहादुर शाहीलाई प्रस्तावक र राप्रपाकै अन्य सांसदहरू खुश्बु ओली, ताहिर अलि र भरत गिरीलाई समर्थक रहेका छन् ।
रुवीकुमारी ठाकुरलाई सत्तारुढ दल रास्वपाले समर्थन गरेको महामन्त्री कविन्द्र बुर्लाकोटीले जानकारी दिए ।
