काठमाडौँ, चैत २५ । प्रतिनिधिसभाको बुधबारको बैठकमा विभिन्न पार्टीका सांसदहरूले सरकार निरङ्कुश र स्वेच्छाचारी बन्दै गएको आवाज उठाएका छन् । विभिन्न पार्टीबाट संसद् छिरेका सांसदहरूले बुधबार सम्पन्न प्रतिनिधिसभा बैठकको छलफलको दौरानमा सांसदहरूले सो धारणा राखेका हुन् ।

कांग्रेस सांसद नरेन्द्रकुमार केरुङ

निजी सञ्चारमाध्यमलाई सरकारी विज्ञापन नदिने निर्णयको कांग्रेस सांसद नरेन्द्रकुमार केरुङले विरोध जनाएका छन् । सरकारी विज्ञापन निजी क्षेत्रका सञ्चारमाध्यमलाई दिन नपाउने सरकारको पछिल्लो निर्णयप्रति कडा केरुङले कडा आपत्ति जनाए । प्रतिनिधिसभाको बुधबारको बैठकमा बोल्दै सांसद नरेन्द्रकुमार केरुङले सरकारको यो कदम उदार अर्थतन्त्रको नीति र लोकतान्त्रिक मूल्य मान्यता विपरीत भएको भन्दै विरोध जनाएका छन् ।

सरकार निरंकुश बन्दै गएको छः सांसद राई

नेपाल कम्युनिस्ट पार्टीकी सांसद जयन्तीदेवी राईले सरकार निरंकुश बन्दै जान लागेको आरोप लगाएकी छिन् । राष्ट्रिय सभाको बुधबार बसेको बैठकको विशेष समयमा बोल्दै उनले सरकारले निजी सञ्चारमाध्यमहरूमा सरकारी सूचना तथा विज्ञापन रोक लगाउने निरंकुश निर्णय गरेको बताइन् ।

एमाले सांसद घतानीको माग

प्रतिपक्ष दल नेकपा (एमाले) की सांसद नीता घतानीले पार्टी अध्यक्ष केपी शर्मा ओलीमाथि लगाइएको मुद्दा तत्काल फिर्ता लिन सरकारलाई दबाब दिएकी छिन्। बुधबार प्रतिनिधि सभाको बैठकमा बोल्दै उनले राजनीतिक प्रतिशोधका आधारमा मुद्दा चलाइएको भन्दै सरकारको कडा आलोचना गरेकी छिन् ।

लोकतन्त्रमाथि नै प्रहार : रास्वपा सांसद बास्कोटा

संसद् बैठकमा सरकारका शीर्ष नेताहरूको अनुपस्थितिलाई लिएर सत्तारुढ दलकै सांसदहरूले गम्भीर असन्तुष्टि जनाएका छन् । बुधबारको प्रतिनिधि सभा बैठकमा राष्ट्रिय स्वतन्त्र पार्टी (रास्वपा) की सांसद समीक्षा बास्कोटाले संसद्को पहिलो लहरका कुर्सीहरू खाली देख्दा लोकतन्त्रमाथि नै प्रहार भइरहेको भएको भन्दै टिप्पणी गरेकी हुन् ।

सरकारले नागरिकका आधारभूत समस्यालाई नजरअन्दाज गर्यो : पूर्ण लिम्बू

श्रम संस्कृति पार्टीका सांसद पूर्ण लिम्बूले सरकारले नागरिकका आधारभूत आवश्यकतालाई नजरअन्दाज गर्दै डिजिटल ट्रान्सफर्मेसनजस्ता महँगो र महत्वाकांक्षी योजना अघि सारेको भन्दै आपत्ति जनाएका छन् । प्रतिनिधिसभाको बुधबारको बैठकमा बोल्दै उनले यस्तो आपत्ति जनाएका हुन्।

प्रतिनिधिसभा बैठक शुक्रबार बस्ने गरी स्थगित गरिएको छ । बुधबार सभामुख डोलप्रसाद अर्यालले बैठक चैत २७ गते शुक्रबार दिनको ४ बजे बस्ने गरी स्थगित गरेका हुन् । यस दिन उपसभामुखको निर्वाचन हुनेछ ।